ჟენევის საერთაშორისო მოლაპარაკებების მორიგ რაუნდზე, მოლაპარაკებათა თანათავმჯდომარეებმა მონაწილეებს პროექტი შესთავაზეს, რომელსაც "ხუთი ნაბიჯი შუალედური უსაფრთხოების რეჟიმისკენ" ეწოდება. განცხადება ამის შესახებ ოს სეპარატისტთა ლიდერის ე.წ. რწმუნებულმა, პოსტკონფლიქტური დარეგულირების საკითხებში, ბორის ჩოჩიევმა გააკეთა. მისივე თქმით, ოსმა სეპარატისტებმა ამ დოკუმენტის მიღებაზე უარი განაცხადეს და მას ქართული მხარით ნაკარნახევი უწოდეს.
"სამხრეთ ოსეთის მხარემ ეს დოკუმენტი გააკრიტიკა და მას საქართველოში შემუშავებული ამერიკული პროექტი უწოდა. ჩვენ განვაცხადეთ, რომ ამ პროექტის განხილვასაც კი არ ვაპირებთ. აქ აბსოლუტურად არ არის ასახული რეალური სიტუაცია და ჩვენი მხარის მიზანი. ეს არის პროექტი, სადაც ასახულია ყველას ინტერესი გარდა აფხაზეთისა, სამხრეთ ოსეთისა და რუსეთისა", _ აცხადებს ჩოჩიევი.
შეგახსენებთ, რომ ჟენევის საერთაშორისო მოლაპარაკებების მე-17 რაუნდი გუშინ ჟენევაში გაიმართა. მომავალი რაუნდი კი ჟენევაში მიმდინარე წლის დეკემბრის შუა რიცხვებში გაიმართება.
მასალის გამოყენების პირობები
