უკრაინის პრეზიდენტი ვოლოდიმირ ზელენსკი გამოეხმაურა აშშ-ის სახელმწიფო მდივნის, მარკო რუბიოს განცხადებას, რომლის მიხედვითაც უკრაინაში ომის დიპლომატიური გზით დასრულება ამ ეტაპზე შეუძლებელია, რადგან ვითარება ჩიხში შევიდა. ზელენსკიმ აშშ-ს მოუწოდა, დაეხმაროს უკრაინას საჰაერო უპირატესობის მოპოვებაში და რუსეთის წინააღმდეგ ზეწოლა გააძლიეროს.
ამის შესახებ ზელენსკიმ ჟურნალისტებთან საუბრისას, ჩერნიჰივის ოლქის ქალაქ პრილუკში განაცხადა, სადაც 7 ოქტომბერს რუსეთის მიერ სარაკეტო დარტყმის შედეგად 22 ადამიანი, მათ შორის 5 ბავშვი, დაიღუპა.
„ომის განმავლობაში ძალიან ბევრი განსხვავებული მომენტი გვინახავს. იყო ბევრი გამოუვალი სიტუაცია, რთული მდგომარეობა და ა.შ. ჩვენ თვითონ - ადამიანები, ლიდერები, პოლიტიკოსები, თავად ვიგდებთ თავს ჩიხში... ომის პირველ დღესაც კი ჩიხში არ ვყოფილვართ. იმიტომ, რომ ერთმა ადამიანმა მთელი ხალხის ჩიხში მოქცევა სცადა, მაგრამ ხალხი აჯანყდა და საკუთარ სახელმწიფოს იცავდა“, - განაცხადა ზელენსკიმ.
მისი თქმით, არსებული ვითარებიდან გამოსვლა რთული არ არის და ამისთვის საჭიროა რუსეთის წინააღმდეგ ეკონომიკური ზეწოლის გაძლიერება, უკრაინისთვის რუსეთის ტერიტორიაზე „სტარლინკზე“ წვდომის მიცემა და მოსკოვთან სამომავლო ეკონომიკურ პროექტებზე შეთანხმებისგან თავის შეკავება.
„ერთი მხრივ, არ შეიძლება რუსებთან სამომავლო რაიმე ეკონომიკურ პროექტებზე შეთანხმება და, მეორე მხრივ, იმის თქმა, რომ ჩვენ დიპლომატიურ ჩიხში ვართ. ჩვენ დიპლომატიურ ჩიხში არ ვართ. მთლიანად ჩაკეტეთ მათთვის [რუსეთისთვის] ეკონომიკური სივრცე. რუსეთს პირი ამოუკერეთ. ნუ მიაწვდით მათ თქვენს პროდუქციას. უბრალოდ, დაუწესეთ სანქციები მათ იარაღს. გაგვიხსენით „სტარლინკი“ ჩვენთვის, უკრაინისთვის“, - განაცხადა ზელენსკიმ.
მან ასევე აღნიშნა, რომ აშშ-ს მსგავსი მიდგომა ირანის წინააღმდეგ მოქმედებისას უკვე გამოუყენებია და მაშინ, მისი თქმით, „ისრაელი სრულად აკონტროლებდა ცას ირანის თავზე“.
„ანუ, როცა ეს თქვენ გჭირდებათ, მაშინ ეს ასე მუშაობს... უბრალოდ, აკონტროლებთ ცას, რათა თავი დაიცვათ. აშშ-ს ამის შესაძლებლობა აქვს. უკრაინის დახმარება მათთვის არაფერს წარმოადგენს. მე ამას ღიად ვამბობდი: „მოგვეცით ეს შესაძლებლობა, დაგვეხმარეთ ცის დაცვაში და საჰაერო სივრცეში უპირატესობის მოპოვებაში. მაშინ პუტინი მოლაპარაკების მაგიდასთან დაჯდება. რატომ? იმიტომ, რომ ყველაფერს დაკარგავს. ორ-სამ თვეში ყველაფერს დაკარგავს“. ჩვენ კი ველოდებით, როდის შექმნიან ჩინელები„სტარლინკის" ანალოგს და გადასცემენ რუსეთს. მაშ, სად არის აქ სიმართლე, სად არის გულწრფელობა? რა ჩიხზეა საუბარი? ამას სურვილის არქონა ჰქვია“, - თქვა ზელენსკიმ.
