იმ ადამიანთაგან, რომლებსაც ყარაბაღისა და აფხაზეთის პრობლემების მოგვარება შეეძლოთ ცოცხალი მხოლოდ ერთია. ამიერკავკასიაში იყო სამი სერიოზული ხელმძღვანელი, რომლებსაც ქვეყანაში სიტუაციის კონტროლი შეეძლოთ - ჰეიდარ ალიევი, კარენ დემირჩიანი და ედუარდ შევარდნაძე. ეს განცხადება საქართველოს ექს-პრეზიდენტმა ედუარდ შევარდნაძემ "ვესტი. აზ"-ისთვის მიცემულ ინტერვიუში გააკეთა.
"აზერბაიჯანის დამოუკიდებლობა ჰეიდარ ალიევის დამსახურებაა. მას სახელმწიფოს მმართველობის უზარმაზარი გამოცდილება ჰქონდა. ეს ერთი. მას ჰქონდა მოსკოვის დიდი მხარდაჭერაც, მას მხარს პოლიტბიუროს რამდენიმე წევრი უჭერდა. აზერბაიჯანს, საქართველოსგან განსხვავებით, უფრო უჭირდა, დამოუკიდებლად დარჩენილიყო. ამას ყარაბაღის პრობლემაც დაემატა. სამივე მჭიდრო თანამშრომლობაში ვიმყოფებოდით ერთმანეთთან. ჩვენ რომ სახელმწიფოთა მეთაურები ვიყოთ, არავითარი უთანხმოება არ იქნებოდა. დემირჩიანი ტერორისტებმა პარლამენტში მოკლეს და ეს ძალიან დასანანია. ის რომ ცოცხალი იყოს და ჰეიდარ ალიევიც ჩვენთან იყოს, ყარაბაღისა და აფხაზეთის საკითხები უკვე დიდი ხანია გადაიჭრებოდა", _ აცხადებს შევარდნაძე.
