ოს სეპარატისტთა ე.წ. სახელმწიფო უშიშროების კომიტეტის თავმჯდომარე ბორის ატოევი აცხადებს, რომ ე.წ. სამხრეთ ოსეთის ტერიტორიაზე განხორციელებული ყველა ტერორისტული აქტის უკან საქართველოს სპეცსამსახურები დგანან. მისივე თქმით, საქართველოს სპეცსამსახურების საქმიანობა ე.წ. სამხრეთ ოსეთის ტერიტორიაზე ე.წ. რესპუბლიკაში სიტუაციის შერყევისკენაა მიმართული.
"ამავდროულად, ისინი ჩვენი მოქალაქეების გადაბირების მიზნით ისინი იყენებდნენ შანტაჟს, რთავდნენ მათ კონტრაბანდულ გარიგებებში, უდებდნენ ნარკოტიკებსა და ყალბ ფულს. ამ მეთოდებით ისინი ახლაც სარგებლობენ", _ აცხადებს ატოევი.
მისივე თქმით, ე.წ. სამხრეთ ოსეთის ყველა მოქალაქე იმის მიუხედავად იმყოფებიან ისინი საქართველოში თუ არა ქართული სპეცსამსახურების დაკვირვების ობიექტია.
"მათზე ხორციელდება ფსიქოლოგიური ზეწოლა, იმისათვის რათა საქართველოს სპეცსამსახურებმა მიიღონ ინფორმაცია სამხრეთ ოსეთში არსებული სამხედრო ობიექტების შესახებ", _ აცხადებს ატოევი და აღნიშნავს, რომ საქართველოს ტერიტორიაზე არსებობს სპეციალური ცენტრები, რომლებშიც დანაყოფების მომზადება მიმდინარეობს.
"სწორედ ამ ცენტრებში ამზადებენ ადამიანებს დივერსიულ-ტერორისტული აქტების ჩასადენად. ამ ცენტრებში ამზადებენ ისეთ ადამიანებს, რომლებმაც იციან ოსური ენა, მათ შორის ოსებსაც რომლებიც სამხრეთ ოსეთის ტერიტორიაზე მდებარე ქართულ სოფლებში ცხოვრობდნენ. ეს კი მეტყველებს იმაზე, რომ დამშვიდება და სიფხიზლის მოდუნება არ შეიძლება", _ აცხადებს ატოევი.
