იმის მიუხედავად, რომ საქართველოში ბოლო 20 წლის განმავლობაში ხელისუფლების მშვიდობიანი შეცვლა არ მომხდარა, ქვეყნისთვის პროცესების მშვიდობიანი განვითარება აუცილებელია. ამის შესახებ „ჯი-ეიჩ-ენთან" საუბარში პროფესორმა, ისტორიკოსმა ნესტან კირთაძემ განაცხადა.

„დაველოდოთ 9-საც და სხვა რიცხვებსაც, მაგრამ მშვიდობიან პროცესს ალტერნატივა არ აქვს. საქართველოში ბოლო 20 წლის განმავლობაში ჯერ არ მომხდარა ხელისუფლების მშვიდობიანად შეცვლა. თითქოს ამან ტრადიციულობის უფლებაც მოიპოვა. თუ ჩვენ სწორედ დემოკრატიული არჩევნების შედეგების მიხედვით არ გავაგრძელეთ მომავლისაკენ სვლა საქართველო სახელმწიფოებრივად დშლილი გვექნება", - განაცხადა კირთაძემ.

კირთაძის თქმით, რევოლუცია ნებისმიერ ეპოქაში ეფუძნება და გამომდინარეობს გარკვეული პრინციპებიდან და როდესაც გომიერი ხელისუფლება ხვდება იმას, რომ მისმა ქმედებებმა შესაძლოა ქვეყენას ზიანი მიაყენოს ის ან რეფორმებს ატარებს ან კიდევ გადაჰყვება რევოლუციას.

„ხელისფლების გამოსაფხიზლებელი შხაპის რეცეპტს მე ვერ გამოვწერ და ეს არავის არ სჭირდება. ხელისუფლებამ რაც შეძლო იმ გზით იარა და მისი შესაძლებლობები გამოვლინდა ორ მძიმე ფაქტორში. ეს არის ძალადობა და შიში, რასაც დაემატა მესამე არანაკლები ფაქტორი - სიყალბე და გაყალბება. დღეს ლაპარაკი არ არის ხელისუფლების საშემოდგომო გამოცდებზე და ვითარების გამოსწორებაზე, არამედ იმაზე, ქართული პოლიტიკურ გონი - საზოგადოება, ასევე ქართველი ხალხი რა გზას აირჩევს. რა გვინდა ჩვენ? თუ ამ კითხვას დავსვავთ, ამის კვალდაკვალ ივლის საქართველო და ქართველი ხალხი. დაანონსებულ რევოლუციები, რევანშიზმი, სკამების ხელახლა მოპოვება, ქონების დაბრუნება და ა.შ. ეს უკვე სხვა გზა არის - ამას ჰქვია ამბოხება. რევოლუცია ზოგადად ასეთი არ არის", - აცხადებს კირთაძე და განმარტავს, რომ „ან იმ გზით უნდა გამოვარდეს ხალხი, რომელსაც უფრო სოციალური ამბოხის ხასიათი ექნება, ან ზუსტი პოლიტიკური დღის წესრიგით".

კირთაძე მიიჩნევს, რომ ქართული ხალხის მოთხოვნები უნდა ქონდეს არა ხელისუფლების მიმართ კონკრეტულად, არამედ ზოგადად.

„რა რეგლამენტით უნდა ქართველ ხალხს ცხოვრება. ერთმანეთისაგან გავარჩიოთ ბრბოს ინსტინქტები, სოციალური ამბოხი, გავარჩიოთ რევოლუცია ბუნებრივი ან დაანონსებული. სრულიად სხვადასხვა პოლიტიკურ კატეგორიასთან გვაქვს საქმე. მე ვისურვებდი, რომ ქართველი ხალხის პროტესტი ყოველთვის ყოფილიყოს მკაფიო პოლიტიკური რეგლამენტით. ეს არის სახელმწიფოებრივი მთლიანობის აღდგენა, საქართველოს იდენტობის შენარჩუნება, სოციალური წონასწორობის აღდგენა, დემოკრატიული პროცესების განვითარება და ეს არის გარე საფრთხეების მოხსნა და კავკასიაში ლიდერი ქვეყნის დაბრუნების ფუნქცია", - განუცხადა „ჯი-ეიჩ-ენს" ნესტან კირთაძემ.