მოსკოვში კომპანია "ლაბორატორია კასპერსკოგოს" დამფუძნებლის ევგენი კასპერსკის 20 წლის ვაჟი ივან კასპერსკი გაიტაცეს. ამჟამად მისი ადგილსამყოფელი უცნობია. ინფორმაციას ამის შესახებ რუსული მედია ავრცელებს.

მათი ინფორმაციით, თავდამსხმელებმა ივან კასპერსკი მაშინ მოიტაცეს, როდესაც იგი სამსახურში მიდიოდა. გატაცება ოფისთან ახლოს მოხდა. ივან კასპერსკი თავისი სადიპლომო ნამუშევრის პროექტზე მუშაობდა და ამავდროულად დასაქმებული იყო თავისი დედის, ნატალია კასპერსკაიას კომპანიაში.

გავრცელებული ინფორმავიით, თავდამსხმელები უკვე დაუკავშირდნენ ევგენი კასპერსკის და მას გამოსასყიდის სახით 3 მილიონი ევრო მოსთხოვეს. ევგენი კასპერსკი ამ დროს ლონდონში იმყოფებოდა და იგი მოსკოვში დაბრუნდა.

გამტაცებლების მოსაძებნად ყველა შესაძლო ძალაა ამოქმედებული: პოლიცია, "ეფ-ეს-ბე" და სისხლის სამართლის სამძებრო. ჯერჯერობით ოფიაციალურად ივან კასპერსკის გატაცების შესახებ კომენტარები არ ქვეყნდება, თუმცა დასტურდება, რომ ივანი გაქრა და მისი ძებნა მიმდინარეობს.

შეგახსნებთ, რომ "ფორბსის" ინფორმაციით, ევგენი კასპერსკის რუს მილიარდერთა სიაში 125-ე ადგილი უჭირავს და მისი კაპიტალი 800 მილიონ აშშ დოლარს შეადგენს. მის ხელთაა კომპანია "ლაბორატორია კასპერსკოგოს" საკონტროლო პაკეტი. კომპანია ანტივირუსებს და კომპიუტერის უსაფრთხოების დამცავ საშუალებებს აწარმოებს. გატაცებული ბიჭის დედა კი ნატალია კასპერსკაია რუსეთის 50 ყველაზე გავლენიანი ქალის ნუსხაში შედის.