ჩეხეთის პრეზიდენტი პეტრ პაველი აცხადებს, რომ დონალდ ტრამპის მიერ რუსული დიზელის საწვავის მიმართ სანქციების გაუქმების გამო მოსკოვმა ხელიდან გაუშვა ზავის მიღწევის შესაძლებლობა, რომელიც, მისი აზრით, უკვე ახლოს იყო.
პაველის განცხადებით, აშშ-ისა და ევროპის მიერ რუსეთის ნავთობის, ოლიგარქებისა და მრეწველობის სხვა სექტორების წინააღმდეგ კოორდინირებულმა სანქციებმა რუსეთი რთულ მდგომარეობაში ჩააყენა.
თუმცა, ტრამპის მიერ ამ თვის დასაწყისში გამოცხადებულმა შეთანხმებამ, რომლის თანახმადაც რუსეთს აშშ-ისთვის ასობით ათასი ტონა დიზელის საწვავი უნდა მიეწოდებინა, კრემლს „ამოსუნთქვის შესაძლებლობა“ მისცა.
„ახლა ყველაფერი გაცილებით რთული იქნება. რუსეთი ამ იმპულსს ზეწოლისგან თავის დასაღწევად გამოიყენებს და ეს მისთვის ერთგვარი მორალური სტიმულია“, - მიიჩნევს პაველი.
ოთხშაბათს თეთრ სახლში განაცხადეს, რომ ტრამპმა შეთანხმებას „წარმატებით მიაღწია“, რათა მსოფლიო ბაზარი „დიზელის საწვავის უზარმაზარი მოცულობით მოემარაგებინა და ფასები შეემცირებინა“.
პაველმა ასევე მხარდაჭერა გამოუცხადა უკრაინის პრეზიდენტ ვოლოდიმირ ზელენსკის, რომელიც ბოლო პერიოდში დონალდ ტრამპის მხრიდან მწვავე კრიტიკის ობიექტი გახდა.
„ვფიქრობ, პრეზიდენტი ზელენსკი და მთელი უკრაინა ამ კონფლიქტის მსხვერპლნი არიან. ამიტომ, ალბათ, მე უკანასკნელი ვიქნები, ვინც უკრაინას დაადანაშაულებს იმაში, რომ კონფლიქტი მისი ბრალია. რუსეთს უკრაინა არ დასხმია თავს. რუსეთს უკრაინა არ დამუქრებია“, - ხაზგასმით აღნიშნა ჩეხეთის პრეზიდენტმა.
მისი თქმით, ტრამპი რუსეთის მიმართ უფრო ღია მიდგომას ავლენს, ვიდრე ნებისმიერი ევროპელი ლიდერი.
„გარკვეულწილად, შესაძლოა, მას ვლადიმირ პუტინი, როგორც ძლიერი ლიდერი, იზიდავდეს, თუმცა არ ვფიქრობ, რომ პრეზიდენტი ტრამპი ამ საკითხს დემოკრატიასა და ავტოკრატიებს შორის დაპირისპირების ჭრილში განიხილავს. ის ამას შეერთებული შტატების ეკონომიკური კეთილდღეობის თვალსაზრისით უყურებს“, - დასძინა პაველმა.
მიუხედავად იმისა, რომ პაველმა დიზელის საწვავის შესახებ შეთანხმების გამო შეშფოთება გამოთქვა, მან უარი თქვა იმის მტკიცებაზე, რომ შეერთებულმა შტატებმა უკრაინას ან სხვა ევროპელ პარტნიორებს უღალატა.
„ჯერ არ ვიცი, შეიძლება თუ არა ამას ღალატი ვუწოდოთ, მაგრამ მე ამას შეცდომას დავარქმევდი. რადგან ეს ახლა რუსეთს ახალ იმედს აძლევს - იმედს, რომ მას შეუძლია უგულებელყოს ევროპა და უკრაინა, ყურადღება შეერთებულ შტატებთან და, შესაძლოა, ჩინეთთან შეთანხმების მიღწევაზე გადაიტანოს და ყველაფერი საკუთარი პრიორიტეტებისა და სტრატეგიების შესაბამისად წარმართოს. მიმაჩნია, რომ ეს აშკარად ეწინააღმდეგება ევროპის ინტერესებს“,- განაცხადა მან.
პაველმა ასევე არ გამორიცხა, რომ მომავალში ევროპულმა ქვეყნებმა შესაძლოა რუსული ნავთობის შესყიდვა განაახლონ, თუმცა დასძინა, რომ ამისთვის „დრო იქნება საჭირო“.
„თუ ერთ დღეს რუსეთი ისეთ ქვეყნად იქცევა, რომელიც სხვა ქვეყნების სუვერენიტეტსა და საზღვრებს პატივს სცემს, მაშინ რატომ არ უნდა გვქონდეს მასთან ჩვეულებრივი საქმიანი ურთიერთობები? თუმცა რუსეთს ამ დონემდე ჯერ არ მიუღწევია“, - თქვა ჩეხეთის პრეზიდენტმა.
