საპარლამენტო უმრვალესობის შეფასებით, ოპოზიციას გაუჭირდება მოძებნოს კონსტიტუციასთან შეუსაბამობა პოლიციისთვის არალეტალური იარაღის გამოყენების უფლების მინიჭების საკითხზე. ამის შესახებ საპარლამენტო უმრავლესობის ერთ-ერთმა ლიდერმა პავლე კუბლაშვილმა განაცხადა.
"არალეტარული იარაღის გამოყენება მასობრივი არეულობის დროს ყველა ქვეყანაში მიღებული ფორმაა. შესაბამისად, ჩვენს ოპონენტებს ძალიან გაუჭირდებათ საუბარი, არალეტალური იარაღის გამოყენება რომელ კონსტიტუციურ ნორმასთან ან საერთაშორისო სტანდარტებთან არის შეუსაბამობაში", - აღნიშნა კუბლაშვილმა.
უმრავლესობის წევრმა დასძინა, რომ მიუხედავად ამისა, დარწმუნებულია ოპოზიცია მაინც მოახერხებენ ამის მტკიცებას.
"მათი ნიჭიერებაში ამ კუთხით ეჭვი არ მეპარება", - აღნიშნა კუბლაშვილმა.
გავრცელებული ინფორმაციით, არასაპარლამენტო ოპოზიციის ნაწილი გეგმავს საკონსტიტუციო სასამართლოს მიმართოს და პოლიციისთვის არალეტალური იარაღის გამოყნების უფლების გაუქმება მოითხოვოს.
შეგახსენებთ, რომ "პოლიციის შესახებ" კანონში 2009 წელს მიღებული ცვლილებების თანახმად, სამსახურებრივი მოვალეობის განხორციელებისას, საზოგადოებრივი წესრიგისა და უშიშროების დაცვის, დანაშაულთან და საზოგადოებრივად საშიშ ქმედებებთან ბრძოლის მიზნით, პოლიციას უფლება აქვს გამოიყენოს სპეციალური საშუალებები: ხელბორკილი ან შებორკვის სხვა საშუალება, არალეტალური იარაღი (მათ შორის, არალეტალური ჭურვი), რეზინის ხელკეტი, ცრემლსადენი გაზი, წიწაკის გაზი, აკუსტიკური საშუალება, ფსიქოლოგიური ზემოქმედების შუქბგერითი მოწყობილობა, დაბრკოლების დამანგრეველი და ტრანსპორტის იძულებითი გაჩერების საშუალება, წყალსატყორცნი, ჯავშანმანქანა და სხვა სპეციალური სატრანსპორტო საშუალება, სპეციალური საღებავი, სასამსახურო ძაღლი და ცხენები, ელექტროშოკური მოწყობილობა.
