ბელორუსული კომპანია "კლასიჩესკიე ვინა" უარყოფს მათი მისამართით გამოთქმულ ბრალდებებს, რუსეთში ქართული მინერალური წყლის "ბორჯომის" უკანონო შეტანასთან დაკავშირებით. ინფორმაციას ამის შესახებ რუსული მედია ავრცელებს.
"ბელორუსის ფარგლებს გარეთ ჩვენი კომპანიის მიერ არ ყოფილა და არც იქნება გადატანილი არც ერთი ბოთლი "ბორჯომი". ჩვენ მხოლოდ და მხოლოდ ბელორუსის შიდა ბაზარზე ვმუშაობთ", _ განაცხადა რუსულ მედიასთან სუბარში კომპანიის მმართველმა ვალერი ნავროტსკიმ.
შეგახსნებთ, რომ ბელორუსიიდან რუსეთში არალეგალურად შეტანილი ქართული მინერალური წყალი "ბორჯომი" აღმოაჩინეს. ამის შესახებ "როსპოტრებნადზორის" ხელმძღვანელმა გენადი ონიშჩენკომ განაცხადა.
კონტრაბანდულ ბორჯომს სხვადასხვა რეგიონის სასურსათო ბაზრებზე მიაკვლიეს, მათ შორის, იგი მოსკოვშიც აღმოჩნდა. აქციზური მარკის მიხედვით, მისი იმპორტიორი "კლასიჩესკიე ვინა" აღმოჩნდა, რომელიც მინსკშია დარეგისტრირებული.
"ბორჯომის" მინერალური წყალი, ქართულ ღვინოსთან ერთად, რუსული ბაზრიდან ჯერ კიდევ 2006 წელს ამოიღეს. 2009 წელს კი მოსკოვმა მინსკი დაადანაშაულა, რომ ბელორუსიიდან რუსეთში იმ დროს აკრძალული სხვა პროდუქტები ხვდებოდა, მათ შორის, მოლდავური ღვინო.
2011 წლის დსაწყისში ონიშჩენკომ აღნიშნა, რომ ბელორუსია რუსეთთან, ბელორუსიასა და ყაზახეთთან გაფორმებული საბაჟო კავშირის საფუძველზე, სანიტარულ ნორმებს არ იცავდა.
