21-ე საუკუნეში ოკუპირებული ტერიტორიებთან შეგუება სახიფათო იქნება არ მხოლოდ საქართველოსთვის, ასევე მთელ მსოფლიოსთვის.
ამის შესახებ ჟურნალისტებს საპარლამენტო უმრავლესობის წევრმა, საგარეო ურთიერთობათა კომიტეტის თავმჯდომარემ აკაკი მინაშვილმა რუსეთის საგარეო საქმეთა სამინისტროს განცხადების კომენტირებისას განუცხადა.
"21-ე საუკუნეში კი ოკუპირებულ ტერიტორიებთან შეგუებას არავინ არ აპირებს, რადგან ეს სახიფათოა არ მხოლოდ საქართველოსთვის, ასევე მთელ მსოფლიოსთვის, რადგან თუ ვინმე ამას დაუშვებს შეიძლება მსგავსი პრეცედენტი მომავალშიც განმეორდეს", - აღნიშნა მინაშვილმა.
მისივე შეფასებით, საერთაშორისო ზეწოლის შედეგად რუსეთს მოუწევს ხისტი პოზიციის შეცვლა, თუ მას უნდა, რომ დასავლეთისთვის ნორმალური პარტნიორი იყოს.
"ამ პარტნიორობის გარეშე მას ძალიან სერიოზული პრობლემები შეექმნება, თუნდაც ეკონომიკური. ამას რუსეთის ფედერაცია თავადაც აცნობიერებს", - აღნიშნა მინაშვილმა და აქვე დასძინა, რომ საერთაშორისო თანამეგობრობის ყურადღება და აქტიურობა საქართველოსთან მიმართებაში მზარდია.
"რამდენიმე დღის წინ აშშ-ს სახელმწიფო მდივანმა გააკეთა განცხადება, რომ საქართველოს საკითხი ძალიან მაღალ დონეებზე განიხილება რუსეთ-ამერიკის ურთიერთობაში. ამასთან, საერთაშორისო საზოგადოება მუდმივად აპელირებს იმ ფაქტზე, რომ რუსეთი არღვევს საერთაშორისო სამართლის ნორმებს და 2008 წლის 12 აგვისტოს შეთანხმებით დაკისრებულ ვალდებულებებს", - აცხადებს დეპუტატი.
ამასთან, პარლამენტის საგარეო კომიტეტის თავმჯდომარის შეფასებით, რუსეთის ხისტმა პოლიტიკამ მათ შორის აფხაზეთის და ე.წ. სამხრეთ ოსეთის აღიარების კუთხით არ გაამართლა და ამას კრემლი ხვდება.
"ორი წლის განმავლობაში მიუხედავად რუსეთის ფედერაციის დიდი მცდელობისა დაერწმუნებინა სახელმწიფოები, რომ აფხაზეთი და ცხინვალის რეგიონის დამოუკიდებლობა ეღიარებინათ კრახით დასრულდა. მხოლოდ რამოდენიმე ოდიოზურმა ლიდერმა აღიარა, სხვა სახელმწიფოების პოზიცია ძალიან მტკიცე და ნათელია", - აღნიშნავს მინაშვილი.
