აშშ-სთან და დასავლეთთან კონკურენციის და მეტოქის რეჟიმში ყოფნა გამოიწვევს რუსეთის კრახს, როგორც ეს საბჭოთა კავშირის შემთხვევაში მოხდა.
ამის შესახებ "ჯი-ეიჩ-ენს" საპარლამენტო უმრავლესობის წევრმა, საგარეო ურთიერთობათა კომიტეტის თავმჯდომარის მოადგილემ გიორგი კანდელაკმა რუსეთის დუმის დეპუტატის სერგეი მარკოვის განცხადების შეფასებისას გაუცხადა.
"რუსეთს არ გააჩნია არანაირი რესურსი სტრატეგიულ დონეზე, რომ კონკურენცია გაუწიოს აშშ-ს და დასავლეთს. პირიქით, კრემლის მხრიდან დასავლეთთან კონფლიქტის არიდება არის სასიცოცხლო მნიშვნელობის, რადგან მათი მოჩვენებითი ძლიერება არის დამყარებული მხოლოდ ნავთობზე და შიგნით ყველა პარამეტრით დაღმასვლას განიცდის", - აღნიშნა კანდელაკმა,
ამასთან, დეპუტატის შეფასებით, რუსეთი არა მხოლოდ გადატვირთვის პოლიტიკას, ასევე დიალოგისადმი ნებისმიერ მისწრაფებას დასავლეთისა და შეერთებული შტატების მხრიდან უყურებს, როგორც სისუსტეს.
"თუ გადატვირთვის პოლიტიკა ჩავარდება ამით რუსეთი უფრო მეტს დაკარგავს ვიდრე ამერიკის შეერთებული შტატები", - დასძინა გიორგი კანდელაკმა.
შეგახსენებთ, რომ რუსეთის დუმის დეპუტატის სერგეი მარკოვის შეფასებით, თუ ანტისარაკეტო სისტემების ევროპაში განთავსებასთან დაკავშირებით შეერთებულ შტატებსა და რუსეთს შორის კომპრომისი არ შედგება, გადატვირთვის პოლიტიკა ჩავარდება და ქვეყნები ცივი ომის პერიოდს დაუბრუნდებიან.
