სასჯელაღსრულების, პრობაციის და იურიდიული დახმარების მინისტრი ხათუნა კალმახელიძე და მისი ქვემდგომი პირები კრიმინალები და სადისტები არიან. ამის შესახებ "თავისუფალი დემოკრატების" წევრმა, დეპუტატმა გია ცაგარეიშვილმა დღეს, პარლამენტში სახალხო დამცველის ანგარიშის შეფასებისას აღნიშნა.
"ვინც სახალხო დამცველის ანგარიშში სასჯელაღსრულების ნაწილს გაეცნობა, არ შეიძლება უწყების ხელმძღვანელთან დაკავშირებით არ ჩამოუყალიბდეს ერთი შეხედულება - ეს ადამიანი არის სისხლის სამართლის დამნაშავეა და მის ქვემდგომი პირები - მოადგილეები, დეპარტამენტის უფროსები, სასჯელაღსრულების და რეჟიმების ხელმძღვანელები, მათი მოადგილეები - კრიმინალები და სადისტები, რომლებიც სისტემას მართავენ ფაშისტური მიდგომებით", - აღნიშნა ცაგარეიშვილმა.
ოპოზიციონერმა დეპუტატმა რამდენიმე მაგალითი მოიყვანა, კერძოდ კი 2010 წლის გეგუთის #14 ნახევრად ღია თავისუფლების დაწესებულებაში სპეცრაზმი შეიჭრა და მოაწყო ეგზეკუცია. მათ 200 პატიმარი დააყენეს და სპეცრაზმის კორიდორში გაატარეს, რომლის დროსაც ცემდნენ რეზინის და ხის ხელკეტებით. ასევე, 2010 წლის 19 აგვისტოს ქსნის #15 დაწესებულებაში გააშიშვლეს პატიმრები და ასევე სპეცრაზმის კორიდორში გაატარეს.
"გერმანიის ფაშისტურ კონცლაგრებშიც კი გაუკვირდებოდათ ის მეთოდები რა მეთოდებითაც მართავს მინისტრი თავის სისტემას", - აღნიშნა ცაგარეიშვილმა და აქვე დასძინა, რომ სასჯელაღსრულების სისტემა ჩაკეტილია და გასულია სამოქალაქო კონტროლიდან.
დეპუტატის თქმით, მიუხედავად სურვილისა დეპუტატებს ციხეებში შესვლის უფლებას არ აძლევენ, რომ იქ არსებული ვითარებას გაეცნენ.
