საპარლამენტო უმცირესობის ლიდერმა გიორგი თარგამაძემ ფინანსთა მინისტრ კახა ბაინდურაშვილს სთხოვა, აეხსნა, რატომ არის კრედიტები ძვირი დღეს და არა "როგორი იყო ნიკოლოზ პირველის მეფობის დროს". ამის შესახებ თარგამაძემ პარლამენტში ფინანსთა მინისტრთან გამართულ დებატებზე აღნიშნა.
"თქვენთვის არ მიკითხავს, ნიკოლოზ პირველის მეფობის პერიოდში როგორი იყო საკრედიტო პოლიტიკა. მაინტერესებს, რა აკეთებს ხელისუფლება იმისთვის, რომ დღეს საქართველოში ფული ასეთი ძვირი არ იყოს", - დასძინა თარგამაძემ და მინისტრი ეკონომიკური დანაშაულების დეკრიმინალიზაციის საკითხზე პასუხის გაცემაზე თავის არიდებაში დაადანაშაულა.
"ქრისტიან-დემოკრატების" ლიდერის გამოსვლის საპასუხოდ ბაინდურაშვილმა აღნიშნა, რომ მას არ ჰქონდა სურვილი ნიკოლოზ პირველის მეფობაზე ესაუბრა და წარმოადგინა, როგორ ხდება საკრედიტო პოლიტიკის წარმოება.
"მთავრობა აკეთებს ყველაფერი, რომ ეს ასე მოხდეს. სასესხო პროცენტი შემცირდება, როდესაც ბანკებში იქნება მეტი დეპოზიტი და ამისთვის საქართველოს მთავრობა ყველაფერს აკეთებს", - აღნიშნა ბაინდურაშვილმა.
რაც შეეხება ეკონომიკური დანაშაულების დეკრიმინალიზაციას, მინისტრის განმარტებით, მთავრობა ორიენტირებულია იმაზე, რომ დანაშაული აღმოიფხვრას და თუ მთავრობა დაინახავს, რომ აღარ არის საფრთხე, რომ ყველაფერი განმეორდება, ასეთ შემთხვევაში გადაიხედება 25-ათასიანი ზღვარიც.
