"თელასის" ინფორმაციით, სამსახურებრივი მოვალეობის შესრულებისას წყლისა და დასუფთავების დავალიანების გამო მომხმარებლებისთვის ელექტროენერგიის მიწოდების შეწყვეტის შემდეგ "თელასის" თანამშრომელს ფიზიკური შეურაცხყოფა მიაყენეს.
კომპანია "თელასის" მიერ გავრცელებული განცხადებაში აღნიშნულია, რომ საქართველოს ენერგეტიკისა და წყალმომარაგების ეროვნული მარეგულირებელი კომისიის დადგენილების თანახმად, ქალაქ თბილისში დაინიშნა კომუნალური მომსახურების ერთიან ადმინისტრატორად. დადგენილების თანახმად, აბონენტს, რომელიც არ გადაიხდის წყლისა და დასუფთავების მომსახურების საფასურს, შეუწყდება ელექტროენერგიის მიწოდება. ერთიანი ადმინისტრატორი ვალდებულია, შეუწყვიტოს აბონენტს მომსახურება, თუ მან დროულად არ დაფარა ზემოთ აღნიშნული კომუნალური გადასახადები.
"კომპანია თელასი თავის საქმიანობას ქვეყანაში არსებული კანონმდებლობის და სემეკ-ის მიერ დადგენილ ნორმატიულ აქტებთან შესაბამისად ახორციელებს, აქედან გამოდინარე, კომპანია მოუწოდებს მოსახლეობას არ შეუშალოს ხელი უფლებამოსილების განხორციელებაში, რადგან ყოველივე ეს კანონსაწინააღმდეგო ქმედებაა და მას მოყვება სათანადო რეაგირება", - განაცხადა კომპანია "თელასის" საზოგადოებასთან ურთიერთობის დეპარტამენტის უფროსმა ვალერი ფანცულაიამ .
"თელასმა" დღეს სამგორის რაიონში (მოსკოვის გამზირი მე-4 კვარტალი, მე 3 კორპუსში მე-4 სადარბაზო) კომპანიის თანამრომლის ცემის ფაქტთან დაკავშირებით უკვე მიმართა შსს ისნის რაიონის მე-5 განყოფილებას, აღნიშნულთან დაკავშირებით აღძრულია სისხლის სამართლის საქმე და დაწყებულია გამოძიება.
