აფხაზეთის ოკუპირებულ ტერიტორიაზე ჰეროინის გადამუშავება, დაფასოება და შემდეგ მისი გავრცელება ხდება. ამის შესახებ ჟურნალისტებს უმრავლესობის ერთ-ერთმა ლიდერმა გოკა გაბაშვილმა აშშ-ს სახელმწიფო დეპარტამენტის მიერ გავრცელებული ანგარიშის შეფასებისას განუცხადა.
"ეს ინფორმაცია საქართველოს ხელისუფლებას ყოველთვის ჰქონდა. კოკოითის და ბაღაფშის კრიმინალური რეჟიმები ამ საქმით არიან დაკავებულები, რაც უსაფრთხოების კუთხით საგანგაშოა," - აღნიშნა გაბაშვილმა.
დეპუტატის თქმით, საქართველოს ოკუპირებული ტერიტორიები დღეისთვის შავ ხვრელებს წარმოადგენენ, სადაც სხვადასხვა სახის დანაშაულებები ხდება.
"გვაქვს ინფორმაცია, რომ აფხაზეთის ტერიტორიაზე ჰეროინის გადამუშავება, დაფასოება და შემდეგ მისი ევროპაში გავრცელება ხდება",'- აღნიშნა უმრავლესობის წევრმა.
შეგახსენებთ, რომ აშშ-ს სახელმწიფო დეპარტამენტმა ანგარიში გამოაქვეყნა, სადაც ნათქვამია, რომ საქართველო ნარკოტიკების ტრანზიტის მთავარი კორიდორი ხდება. დეპარტამენტის ანგარიშში აღნიშნიულია, რომ ერთ-ერთი მთავარი მარშუტით ნარკოტიკები საბერძნეთიდან და თურქეთიდან საქართველოს გავლით დასავლეთ ევროპაში ხდება. კლინტონის უწყებაში აღნიშნავენ, რომ ცხინვალის რეგიონსა და აფხაზეთის ტერიტორიას საქართველოს ხელისუფლება ვერ აკონტროლებს და შესაძლოა სწორედ ამ რეგიონებზე გადიოდეს ნარკო ტრანზიტის გზა. "ამ ინფორმაციის შემოწმება შეუძლებელია, რადგან რუსეთის საოკუპაციო ძალები და დე-ფაქტო ხელისუფლება საქართველოს ხელისუფლებას ინფორმაციას არ აწვდიან ნარკოტიკების უკანონო ბრუნვის შესახებ" - ნათქვამია ანგარიშში.
