"ლიბიაში მსოფლიო ომის დაწყების შემთხვევაში, ნავთობის ფასი ერთ ბარელზე 200 დოლარს მიაღწევს",_ ამის შესახებ ვენესუელის პრეზიდენტმა უგო ჩავესმა განაცხადა.
"ასეთი რამ არავის აწყობს. ამიტომაც ვენესუელა მშვიდობის დასაცავად გამოდის,"_აღნიშნა უგო ჩავესმა.
ამასთან, ვენესუელის პრეზიდენტმა ლიბიაში სამოქალაქო ომის თავიდან ასაცილებლად საერთაშორისო კომისიის შექმნა მოითხოვა. მანვე აღნიშნა, რომ სატელეფონო საუბრისას ლიბიის ლიდერი მუამარ კადაფი ამ ინიციატივას დათანხმდა.
ვენესუელის პრეზიდენტმა კიდევ ერთხელ გააკრიტიკა ამერიკა. "ამერიკის იმპერია ცეცხლს ეთამაშება, რადგან ხანძარი, შესაძლოა, ხმელთაშუა ზღვის ქვეყნებში გავრცელდეს". ჩავესმა ისიც მიუთითა, რომ პოლიტიკური გადაწყვეტილებების მიღებაა საჭირო და არა_სამხედრო აქციების გამოყენება.
ცნობისთვის, გუშინ ნავთობზე ფასმა მას შემდეგ დაიწია, რაც არაბულ სახელმწიფოთა ლიგამ ლიბიაში მომხდარი სიტუაციის დასარეგულირებლად მზადყოფნა გამოთქვა. ამის გამო ბარელ ნავთობზე ფასი 1,52 დოლარიდან 114, 83 დოლარამდე გაიაფდა.
შეგახსენებთ, გუშინ მედიაში გაჩნდა ინფორმაცაი, რომ მუამარ კადაფი და არაბულ სახელმწიფოთა ლიგა ვენესუელის პრეზიდენტ უგო ჩავესის მშვიდობიან გეგმას დათანხმდნენ.
"ალ ჯაზირას" ინფორმაციით, უგო ჩავესის გეგმა სპეციალური კომისიის შექმნას გულისხმობს, სადაც ლათინური ამერიკის, ევროპისა და ახლო აღმოსავლეთის ქვეყნების წარმომადგენლები შევლენ. კომისია მეამბოხეებსა და კადაფის 40 წლიან რეჟიმს შორის შუამავლის მისიას იკისრებს.
