Fitch-ის რეიტინგის ამაღლებას საქართველოს პრემიერ-მინისტრი ქვეყნის მნიშვნელოვან წარმატებად აფასებს.
როგორც დღეს სახელმწიფო კანცელარიაში გამართულ ბრიფინგზე, პრემიერ-მინისტრის პრესსამსახურის უფროსმა ნიკო მჭედლიშვილმა განაცხადა, საერთაშორისო სარეიტინგო კომპანია Fitch-მა საქართველოს სუვერენული რეიტინგის პროგნოზი "სტაბილური" "პოზიტიურით" შეცვალა. მისივე განმარტებით, რეიტინგის ამაღლება მსოფლიოში მიმდინარე საკმაოდ რთული ეკონომიკური პროცესების ფონზე ქვეყნის მნიშვნელოვანი წარმატებაა.
მჭედლიშვილი აცხადებს, რომ ამჟამად საქართველოს Fitch-ის მიერ B+ რეიტინგი აქვს მინიჭებული და პროგნოზის ცვლილება ნიშნავს იმას, რომ თუკი ის დადებითი ტენდენციები, რომლებიც ქართულ ეკონომიკაში შეინიშნება მომავაალშიც გაგრძელდება, მაშინ სარეიტინგო კომპანია საქართველოს სუვერენულ რეიტინგს მომავალში გაუზრდის.
"პოზიტიური პროგნოზი ასახავს საქართველოს ეკონომიკის გაჯანსაღებას ქვეყნის საბიუჯეტო და მიმდინარე ანგარიშების დეფიციტის კლებას, სიჯანსაღეს ფინანსური სექტორისა და პოლიტიკური რისკების შემცირებას" - ნათქვამია სააგენტოს მიერ გავრცელებულ პრესრელიზში.
Fitch-ის პროგნოზით, საქართველოში 2011 წელს მშპ-ს ზრდამ 5 % უნდა შეადგინოს, ხოლო 2011 წელს კი 6 %. სააგენტო ასევე მიესალმება ბიუჯეტის დეფიციტის შემცირების ტენდენციას.
სააგენტოს პრესრელიზში ნათქვამია, რომ 2010 წელს საბიუჯეტო დეფიციტი 6,6 პროცენტამდე შემცირდება 2009 წელს არსებული 9,2 პროცენტიდან.
2011 წელს მთავრობა ბიუჯეტის დეფიციტის 3,9 პროცენტამდე შემცირებას გეგმავს, ხოლო დეფიციტმა 2012 წელს 3,1 პროცენტი უნდა შეადგინოს.
როგორც პრემიერ-მინისტრის პრესსამსახურის უფროსი აცხადებს, საგენტომ აღნიშნა, რომ საქართველოს მიმდინარე ანგარიშის დეფიციტი შემცირდა, რაც ტურისტთა გაზრდილი რაიოდენობით, ელექტროენერგიის ექსპორტით და სხვა ფაქტორებით არის გამოწვეული.
სააგენტო აღნიშნავს, რომ ქართული საბანკო სექტორი არის უფრო ძლიერი, დეპოზიტები იზრდება, ასევე იზრდება ბანკების მოგება, გაუმჯობესდა მათი აქტივების ხარისხი.
"უკანასკნელი 18 თვის განმავლობაში, საქართველოში პოლიტიკური რისკები შემცირდა. თუმცა Fitch-ის აზრით ეს რისკები მაინც შედარებით მაღალია. რუსეთთან ურთიერთობები რთულია, მაგრამ სააგენტო მომავალში საომარი მოქმედებების განახლებას არ ელის. შიდა პოლიტიკური რისკები შემცირებულია იმის გამო, რომ მმართველ ნაიცონალურ მოძრაობას დომინანტი პოზიცია აქვს და ოპოზიციური პარტიები ელექტრორატულ პროცესში მონაწილეობენ" - მიიჩნევს სააგენტო.
Fitch-ი ასევ აღნიშნავს, რომ საქართველოში ადამიანური განვითარების ფაქტორი არის ძალიან მაღალი, არის შექმნილი ხელსაყრელი ბიზნეს-გარემო, დაბალია კორუფცია, ძლიერია მთავრობის ადმინისტრირება და ქვეყანას ძლიერი საერთაშორისო მხარდაჭერა აქვს.