"ახალი მემარჯვენეები" ხელისუფლების რევოლუციური გზით შეცვლაში მონაწილეობას არ მიიღებენ და ოპოზიციონერ ლიდერებს რევოლუციების დაანონსებისგან თავის შეკავებას ურჩევენ.
"ძალიან მძიმე გამოცდილება გვაქვს დაანონსებულ რევოლუციებთან დაკავშირებით. ამიტომ არ ვისურვებდი, რომ რომელიმე პოლტიკურ პარტიას ეს გაეკეთებინა. რაც შეეხება ლევან გაჩეჩილაძის განცხადებას, ვერ ვიტყვი, რომ რევოლუცია დაანონსა. მან უბრალოდ თქვა, რომ გაზაფხულზე მოსალოდნელია მღელვარებები და თუ ეს მღელვარება მართლა იქნება, მას სათავეში "ქართული პარტია" ჩაუდგება", - განუცხადა "მემარჯვენეების" ერთ-ერთმა ლიდერმა მანანა ნაჭყებიამ "ჯი-ეიჩ-ენს".
მისივე განმარტებით, ქვეყანაში შექმნილი მძიმე სოციალური ფონის გათვალისწინებით, ხალხის ქუჩაში გამოსვლის საშიშროება მართლაც არსებობს, თუმცა დასჭირდება თუ არა მას ოპოზიციური პარტიის სახით წინამძღოლი, ამას მოვლენათა განვითარება აჩვენებს.
"მძიმე სოციალური ფონი, რა თქმა უნდა, ქმნის იმის საშიშროებას, რომ მოსახლეობა თავისით, ყოველგვარი ოპოზიციური პარტიების ჩარევის გარეშე გამოვიდეს ქუჩაში, თუმცა შემდეგ როგორ მიმართულებას მიიღებს ეს ყველაფერი, ამას მოვლენათა განვითარება აჩვენებს. სწორედ სიტუაცია დაგვანახებს, უნდა ჩაუდგეს თუ არა მოსახლეობის საპროტესტო მღელვარებას სათავეში პოლიტიკური პარტია", - განმარტა ნაჭყებიამ.
რაც შეეხება მოსალოდნელ მანიფესტაციებში "ახლების" მონაწილეობის საკითხს, პარტიის ერთ-ერთი ლიდერი აცხადებს, რომ "ახალი მემარჯვენეები" ხელისუფლების რევოლუციური გზით შეცვლას ეწინააღმდეგება.
"ვფიქრობ, რომ ამ ეტაპზე პოლიტიკური პარტიების ძალისხმევა უნდა იყოს მიმართული იქითკენ, რომ ვაიძულოთ ხელისუფლება, ქვეყანში შეცვალოს საარჩევნო გარემო. უახლოს დღეებში ხელისუფებამ აღნიშნულთან დაკავშირებით თავისი ხედვა უნდა წარმოადგინოს და არ ვურჩევდი მას, საარჩევნო გარემოს გაუმჯობესებისადმი თავისი აგდებული დამოკიდებულებით ქვეყანაში ისედაც დამძიმებული სოციალური და პოლიტიკური ფონი კიდევ უფრო დაემძინებინა", - დასძინა "ახლების" წარმომადგენელმა.
შეგახსენებთ, რომ ლევან გაჩეჩილაძე მიმდინარე სეზონზე რევოლუციას გარდაუვლად მიიჩნევს და როგორც რამდენიმე დღის წინ განაცხადა, ამ პროცესს "ქართული პარტია" წამოიწყებს.
