იანვარ-თებერვალში აჭარის ბიუჯეტი 25,7 %-ის გადაჭარბებით შესრულდა. აჭარის ფინანსთა და ეკონომიკის სამინისტროს ინფორმაციით, იანვარ-თებერვალში ბიუჯეტის გეგმა 14 მლნ. 594 ათას 200 ლარი იყო, თუმცა შესრულებამ 18 მლნ. 339 ათასი ლარი შეადგინა. სამინისტროს ინფორმაციით, ორ თვეში გადასახადების გეგმა 17,7 %-იანი გადაჭარბებით შესრულდა, ხოლო "სხვა შემოსავლების" მუხლი კი 63,6 %-ის გადაჭარბებით. რაც შეეხება "არაფინანსური აქტივების" მუხლს ის იანვარ-თებერვალში 37,6 %-იანი გადაჭარბებითაა შესრულებული.
იანვარ-თებერვალში აჭარის ავტონომიური რესპუბლიკის მუნიციპალიტეტებიდან ყველაზე აქტიური ქობულეთის მუნიციპალიტეტი იყო. სამინისტროს ინფორმაციით, ქობულეთმა ბიუჯეტის გეგმა 1 652,3 %-ით შეასრულა, რაც დაუგეგმავი მიწის ნაკვეთების გასხვისების შედეგად მოხდა. სამინისტროს ინფორმაციით, ქობულეთის მუნიციპალიტეტის ბიუჯეტის გეგმა 108,5 ათასი ლარი იყო, თუმცა იანვარ-თებერვალში შესრულებამ 1 მლნ. 792 ათას 700 ლარი შეადგინა. სამაგიეროდ გარღვევა დაფიქსირდა და ბიუჯეტის გეგმა ვერ შეასრულეს ხულოს (78,1 %) და შუახევის (80,2 %) მუნიციპალიტეტებმა.