ყოფილი საბჭოთა ლიდერი მიხეილ გორბაჩოვი რუსეთის ხელისუფლების არსებულ პოლიტიკას "ხლაფორთს" უწოდებს.
"შეხედეთ, როგორ ყალიბდება დღევანდელი ხელისუფლება. არჩევენ თავიანთ ახლობლებს, ხალხს, ვისთან ერთადაც სწავლობდნენ, ყოფილ მეზობლებს, ვისაც ეზოში ფეხბურთს ეთამაშებოდნენ, პირებს, ვისთან ერთადაც რაღაცებს „ხლაფორთობდნენ", და ახლა ამ „ხლაფორთს" აქაც აგრძელებენ. პიროვნული ერთგულება, პიროვნული ნაცნობობა, ახლობლური ურთიერთობები - ეს არ არის სწორი ფორმა. მე ამას გადაჭრით ვუარყოფ", - აცხადებს გორბაჩოვი რადიო "თავისუფლებასთან" ინტერვიუში.
მისივე შეფასებით, რუსეთის მოქმედი ხელისუფლება ხალხს ღალატობს, რის გამოც აქვე განმარტავს, რომ ქვეყნის მთავრობის ნაცვლად მას სცხვენია.
"დაიტაცეს საკუთრება, ფულს ჩუმად გზავნიან საზღვარგარეთ. კორუფციასთან ომის ნაცვლად, ამის იმიტაცია ხდება. შედეგი რა არის? შარვალი იგივეა, ოღონდ ელვა-შესაკრავი აქვს უკანა მხარეს, ხალხში როგორც იტყოდნენ... მოვა დრო, როცა დასხდებიან და გადაწყვეტენ ვინ მიიღებს მონაწილეობას მომავალ საპრეზიდენტო არჩევნებში და ვინ სად წავა. ეს სამარცხვინოა.. მათ მაგივრად მრცხვენია. მოურიდებლად იქცევიან - თითქოს არც საზოგადოება არსებობს, არც კონსტიტუცია, არც საარჩევნო სისტემა. ისინი - ორნი - მიიღებენ გადაწყვეტილებას. "დუიმვირატია", ასე ვთქვათ. ჩვენ სად ვართ-მეთქი, ვიკითხე, 140 მილიონი ადამიანი? ბევრჯერ ვთქვი, რომ ეს არ მომწონს. აცხადებენ, ქვეყნის მხსნელები ვართო. ჩემი აზრით, აქამდე ბევრი აკლიათ", - განმარტავს გორბაჩოვი.
ამასთან, არჩევნების თემაზე საუბრისას ყოფილი საბჭოთა ლიდერი იმასაც აცხადებს, რომ რუსეთში სამართლიანი არჩევნები 1990-იანი წლების შემდეგ აღარ ჩატარებულა.
"1989 და 1990 წლების შემდეგ, როცა, ჯერ კიდევ საბჭოთა მმართველობის ქვეშ, რესპუბლიკებში გაიმართა პირველი თავისუფალი არჩევნები, ჭეშმარიტად თავისუფალი არჩევნები აღარ ჩატარებულა", - დასძენს საბჭოთა სისტემის რეფორმატორად ცნობილი მიხეილ გორბაჩოვი.
