საქართველოს პრეზიდენტი მიხეილ სააკაშვილი სპეციალური დანიშნულების რაზმს სტუმრობდა. ქვეყნის პირველი პირი იქ უმცროს ვაჟთან ერთად იმყოფებოდა.
მიხეილ სააკაშვილმა სპეცდანიშნულების რაზმის წარმომადგენლებთან ერთად გარკვეული მანძილი ჯერ სირბილით დაფარა, მოგვიანებით ივარჯიშა, ბოლოს კი რაზმის წევრებთან ერთად ისადილა კიდეც.
"სპეცრაზმელების რაზმის წევრები დღეს 3-ჯერ მეტს ვარჯიშობენ. ეს იმისთვის კი არ გვინდა, რომ ვიღაცას ტელევიზიით ვაჩვენოთ, არამედ იმისთვის, რომ ჯარში იყოს დისციპლინა და განსაკუთრებული სულისკვეთება, რასაც მუდმივი ვარჯიში ზრდის", - განაცხადა სააკაშვილმა.
ამასთან, ქვეყნის პირველმა პირმა ჯარისკაცებსაც მიმართა და აღნიშნა, რომ მისთვის სამშობლოს სამსახურში სამხედროებთან ერთად მსახურება, დიდი პატივია.
"არასდროს არ ვწყვეტ ჩვენს შეიარაღებულ ძალებზე ფიქრს, ზრუნვას და შეძლებისდაგვარად ხელისშეწყობას. იცოდეთ, ჩვენმა ქვეყანამ იცის, რომ თქვენი იმედი შეიძლება ჰქონდეს. ჩვენ გვყავდა მსხვერპლი ავღანეთში, მაგრამ უნდა გვესმოდეს, რომ შეიარაღებული ძალებისთვის ყველა ასეთი დანაკარგი უნდა იყოს საწინდარი უფრო მეტი გაძლიერების, უფრო მეტი სულისკვეთების. ჩვენ ყველანი ერთ საქმეს ვემსახურებით. ჩვენი საქმე სამართლიანია, თქვენ უნდა შეასრულოთ ყველაზე რთული დავალებები", - მიმართა პრეზიდენტმა სპეცდანიშნულების რაზმის წევრებს.
