პოლონეთის საგარეო საქმეთა მინისტრ როდისლავ სიკორსკის განცხადებით, რუსეთმა უნდა გადაწყვიტოს, უღირს თუ არა ცხინვალის რეგიონი საკუთარი რეპუტაციის ფასად.
"აქვს კი სამხრეთ ოსეთს რუსეთისთვის ისეთი ფასი, რომ საერთაშორისო საზოგადოების თვალში ის საკუთარ რეპუტაციად უღირდეს? რა თქმა უნდა, ეს რუსეთის გადასაწყვეტია", - განაცხადა პოლონეთის საგარეო საქმეთა მინისტრმა ვაშინგტონში, ამერიკის პროგრესის ცენტრში სტუმრობისას.
ამასთან, მან საქართველოს ტერიტორიული მთლიანობისადმი მხარდაჭერა კიდევ ერთხელ დააფიქსირა და რუსეთთან დიალოგის აუცილებლობაზე ისაუბრა.
"პოლონეთი პატივს სცემს საქართველოს ტერიტორიულ მთლიანობას და რა თქმა უნდა, ვიზიარებთ იმ სულისკვეთებას, რომელიც საფრანგეთის შუამავლობით გაფორმებულ შეთანხმებაშია ჩადებული. მიმაჩნია, რომ რუსეთსა და საქართველოს შორის საჭიროა საერთო ენის გამონახვა მშვიდობიან ატმოსფეროში, საჭიროა ამისთვის ყველა რესურსის გამოყენება", - განმარტა სიკორსკიმ.
