აჭარის უმაღლესი საბჭოს ფრაქცია "ქრისტიან დემოკრატების" წევრმა, ხელვაჩაურის მაჟორიტარმა დეპუტატმა ზაზა შაშიკაძემ, სარფის საბაჟოზე ტვირთის გადმოტანასთან დაკავშირებით შექმნილ სიტუაციასთან დაკავშირებით ბრიფინგი გამართა.
2011 წლის პირველი თებერვლიდან, ფინანსთა მინისტრის ბრძანებით, სარფის საბაჟო გამშვებ პუნქტზე ტვირთის გადმოტანის წესები შეიცვალა.
შაშიკაძის თქმით, გამარტივების ნაცვლად, როგორც ამას საქართველოს მთავრობა ირწმუნება, საქონლის გადმოტანა საკმაოდ გამკაცრდა, გაურკვეველიც კი გახდა ადამიანებისთვის რისი უფლება აქვთ საზღვრის გადმოკვეთისას და რისი არა.
"ის რაც კანონში წერია სხვაა, რეალურად ამოქმედებული სანქციები კი მიუთითებს საპირისპიროს", - აცხადებს შაშიკაძე.
მისი განმარტებით, შეზღუდვები წვრილ მეწარმეებთან ერთად სატვირთო ავტომანქანებით საქონლის გადმომტანებსაც შეეხოთ.
"არადა ფინანსთა მინისტრის 2011 წლის 1-ლი თებერვლის დადგენილებაში წერია, რომ "საქონლის შემოტანა საავტომობილო მიმოსვლისთვის გახსნილი პორტალების გავლით შესაძლებელია მხოლოდ სატვირთო ავტოსატრანსპორტო საშუალებით", - აღნიშნავს შაშიკაძე.
"ქრისტიან დემოკრატების" განმარტებით, თითქმის ერთი თვეა ასეულობით მცირე სატვირთო მანქანის მძღოლს, რომლებიც საქართველოს ტერიტორიაზე მცირე ბიზნესს აწარმოებენ, გაჩერებულნი არიან და საქონელი ვერ შემოაქვთ.
"სარფის საბაჟოზე მძღოლებს კონკრეტულ მიზეზს ვერ უსახელებენ, თუ რატომ ვრცელდება მათზე მსგავსი შეზღუდვები. მძღოლებმა ინფორმაციის მისაღებად და დახმარებისთვის ყველა შესაბამის სამსახურს მიმართეს, თუმცა მათ განუცხადეს, რომ იურიდიულად მათ აქვთ მსგავსი სატრანსპორტო საშუალებით ტვირთის შემოტანის უფლება და პრობლემა მებაჟეებთან უნდა მოაგვარონ. მებაჟეები კი აცხადებენ, რომ მართალია კანონი არ ითვალისწინებს აღნიშნულ შეზღუდვებს, თუმცა ისინი ზემდგომი ინსტანციებიდან სიტყვიერი გაფრთხილების საფუძველზე მოქმედებენ. უნდა აღინიშნოს, რომ მსგავსი ტრანსპორტით ტვირთი საქართველოს საბაჟოზე უპრობლემოდ შემოდის თუ ის განკუთვნილია მეზობელი ქვეყნებისთვის. ამის გამო ბათუმელი მცირე მეწარმეები იძულებულნი არიან იქირაონ თურქული ტრანსპორტი, რაც მათ მეტად ძვირი უჯდებათ" , - დაძენს შაშიკაძე.
