ეკონომიკისა და მდგრადი განვითარების მინისტრ ვერა ქობალიას აზრით აგრარულ სფეროში ინვესტიციების მოზიდვა მნიშვნელოვანი საკითხი, რათა დაკმაყოფილდეს ქვეყნის მოსახლეობის მოთხოვნა სოფლის მეურნეობის პროდუქტებზე.
ქობალია დღეს საერთაშორისო კონფერენციას - "წარმატების ფორმულა ქართველ ფერმერებს". დაესწრო, სადაც სოფლის მეურნეობის დარგში არსებულ გლობალურ და რეგიონულ ტენდენციებზე ისაუბრა. როგორც მინისტრმა აღნიშნა, იმ ფონზე, როცა მსოფლიოს მოსახლეობის რიცხვი სწრაფად იზრდება და 2050 წლისთვის 9 მილიარდს მიაღწევს, საკვებ პროდუქტებზე მოთხოვნა კი ამ პერიოდისთვის 70%-ით მოიმატებს, სასურსათო უსაფრთხოება მთელი საერთაშორისო საზოგადოებისთვის აქტუალური თემაა.
კონფერენცია "წარმატების ფორმულა ქართველ ფერმერებს" პრეზიდენტის ადმინისტრაციის მხარდაჭერით ჩატარდა და მასში მთავრობის წევრების გარდა ადგილობრივი და საერთაშორისო საფინანსო ორგანიზაციების და სასოფლო-სამეურნეო სფეროს წარმომადგენლები მონაწილეობდნენ.
ქობალიამ კონფერენციის მონაწილეებს ამ კუთხით სხვა ქვეყნების მაგალითები და გამოცდილება გააცნო და აღნიშნა, რომ საინვესტიციო მიმართულებით მიზანმიმართული მუშაობის შემთხვევაში საქართველოს ხელისუფლება შეძლებს ყველა არსებული ამოცანის მიღწევას, კერძოდ, დამატებითი სამუშაო ადგილების შექმნას, სოფლის მეურნეობის სფეროში თანამედროვე ტექნოლოგიების დანერგვას და რაც მთავარია, ქვეყნის იმპორტზე დამოკიდებულების შემცირებას.