ხვალ, 2 მარტს, პარლამენტის ბიზნესსაბჭოს პირველი სხდომა გაიმართება. აღნიშნულის შესახებ დავალება ბიუროს სხდომაზე პარლამენტის თავმჯდომარემ დავით ბაქრაძემ საფინანსო-საბიუჯეტო და დარგობრივი ეკონომიკისა და ეკონომიკური პოლიტიკის კომიტეტების თავმჯდომარეებს, ზურაბ მელიქიშვილსა და გიორგიო მელაძეს მისცა.
"რამდენიმე ხნის წინ პარლამენტში შედგა პირველი შეკრება ბიზნესის წარმომადგენლებთან და მაშინ შევთანხმდით, რომ შეიქმნებოდა ბიზნესსაბჭო, რომელიც რეგულარულად იმუშავებდა. ამიტომ მელიქიშვილსა და მელაძეს, როგორც ამ დარგის წამყვანი კომიტეტების თავმჯდომარეებს, მინდა დავალება მივცე, რომ ამ კვირაში საბჭოს პირველი სხდომა ჩაატარონ", - აღნიშნა ბაქრაძემ.
მისი თქმით, ბიზნესსაბჭოს შექმნის ინიციატივას პარლამენტის წევრების მხრიდან დიდი ინტერესი მოჰყვა, თუმცა საბოლოდ მიღებული გადაწყვეტილებით მასში კომიტეტების თავმჯდომარეები შევლენ.
"ჩვენი მიზანი იყო ბიზნესსაბჭოში მაქსიმალურად ჩაგვერთო ბიზნესმენები და ბიზნესასოციაციების წევრები, რომლებიც ბიზნესის ფართო სპექტრს ფარავენ", - დასძინა პარლამენტის თავმჯდომარემ.
ბაქრაძის შეფასებით, აუცილებელია ბიზნესმა მუდმივად იგრძნოს, რომ ხელისუფლებას, სახელისუფლებო ინსტიტუციებს და სტრუქტურებს მათ მიმართ პარტნიორული დამოკიდებულება აქვთ.
"ამაში შეუძლია მნიშვნელოვანი როლი შეასრულოს პარლამენტმა. ბიზნესთან ურთიერთობა არის არა თვითმიზანი, არემდე გზა იმისკენ, რომ ამუშავდეს ქვეყნის ეკონომიკა და დავეხმაროთ მოქალაქებს იმ პრობლემების გადალახვაში, რომელსაც ქმნის ინფლაცია და ფასების ზრდა", - განაცხადა პარლამენტის სპიკერმა.
