დღეს ფრაქცია "ქრისტიან-დემოკრატების" მდივანმა მაგდა ანიკაშვილმა და ვანის საკრებულოს წევრმა დავით ლორთქიფანიძემ თბილისის #1 კლინიკურ საავადმყოფოსთან პრესკონფერენცია გამართეს.
"ქრისტიან-დემოკრატიული" მოძრაობა სამედიცინო დაწესებულებების პრივატიზაციის პროცესს აპროტესტებს და მიიჩნევს, რომ დაუშვებელია სახელმწიფო ბიუჯეტი სამედიცინო სფეროში სამუშაო ადგილების შემცირების ხარჯზე შეივსოს.
მოძრაობის ლიდერები ეკონომიკის სამინისტროსგან საავადმყოფოების გასხვისების პროცესში მათი მოთხოვნების გათვალისწინებას მოითხოვენ. კერძოდ, პრივატიზაციის მთავარი პირობა ექიმთა სამუშაო ადგილების შენარჩუნება უნდა იყოს.
როგორც მაგდა ანიკაშვილმა განაცხადა, "თუ ხელისუფლების პრიორიტეტია დასაქმება, მაშინ ტენდერის პირობებში ნათლად უნდა ჩაიწეროს, რომ საავადმყოფოს გასხვისების შემდეგ შტატების შემცირება არ მოხდება".
"მოვუწოდებთ ხელისუფლებას, სასწრაფოდ აღკვეთოს იდეაშივე მცდარი ჩანაფიქრი - ვანის სამშობიარო განყოფილების გაუქმებისა და ვანის რაიონის ერთადერთ რაიონული საავადმყოფოს გაყიდვის შესახებ!"- განაცხადა ლორთქიფანიძემ.
"ქრისტიან-დემოკრატები" მიიჩნევენ, რომ გასხვისების შემდეგ სავალდებულო უნდა იყოს სამედიცინო დაწესებულების პროფილის შენარჩუნება. აუქციონში მონაწილეობის უფლება უნდა მიეცეთ მხოლოდ სამედიცინო საქმიანობის არანაკლებ 10 წლის გამოცდილების მქონე კომპანიებს. ასევე, გაიზარდოს პრივატიზაციის პროცესის გამჭვირვალობა. მედიას, არასამთავრობო სექტორს და მედიკოსებს უნდა ჰქონდეთ სრული ინფორმაცია იმის შესახებ, თუ რომელი კომპანიები გამოთქვამენ საავადმყოფოს შეძენის სურვილს. გასხვისების შემდეგ ახალ მფლობელს უნდა დაეკისროს ექიმთა სახელფასო დავალიანების დაფარვის ვალდებულება.
გავრცელებული ინფორმაციით, უკვე გადაწყვეტილია ვანის რაიონის ერთადერთი საავადმყოფოს გაყიდვა, რაც გამოიწვევს რაიონის 40000-მდე მაცხოვრებელის დარჩენას სამედიცინო მომსახერების გარეშე და ასევე მოსალოდნელია გამოცდილი, პროფესიონალი სამედიცინო პერსონალის მასიური დათხოვნა სამსახურებიდან.
