ხვალ, 2 მარტს, აუქციონზე ვერა ქობალიას უწყება, "არამიანცის" კომპლექსში შემავალი კიდევ ოთხი სამედიცინო დაწესებულების გასხვისებას შეეცდება.
ეკონომიკისა და მდგრადი განვითარების სამინისტროს ინფორმაციით, იყიდება, "გადაუდებელი ნევროლოგიის კლინიკა ნევროლოგის" სახელმწიფო საკუთრებაში არსებული 100%-ი და მისი საწყისი ღირებულება 160 ათას ლარადაა შეფასებული.
სამინისტროს ინფორმაციით, "გადაუდებელი ნევროლოგიის კლინიკა ნევროლოგის" საწესდებო კაპიტალი 153361 ლარია და კლინიკას 43068 ლარის დებიტორული და 77107 ლარის კრედიტორული დავალიანება გააჩნია.
ეკონომიკისა და მდგრადი განვითარების სამინისტრო, 2 მარტისათვის დაგეგმილ აუქციონზე ყიდის ასევე "ტრავმატოლოგიისა და ორთოპედიის კლინიკა სინთეზის", რომლის საწყისი ღირებულებაც 180 ათასი ლარია. კლინიკის საწესდებო კაპიტალი 122318 ლარს შეადგენს და მას 72894.95 ლარის დებიტორული და 391041.64 ლარის კრედიტორული გააჩნია.
2 მარტისათვის დაგეგმილ აუქციონზე გავა ასევე "ნეიროქირურგიული კლინიკა", რომლის საწყისი ღირებულებაც 180 ათასი ლარია. ეკონომიკისა და მდგრადი განვითარების სამინისტროს ინფორმაციით, "ნეიროქირურგიული კლინიკის" საწესდებო კაპიტალი 143270 ლარს შეადგენს. აღნიშნულ სამედიცინო დაწესებულებას კი 3720 ლარის დებიტორული და 40689.19 ლარი კრედიტორული გააჩნია.
ე.წ. "არამიანცის" კომპლექსში შემავალი "ზოგადქირურგიული კლინიკის" გასაყიდი საწყისი ღირებულება 250 ათასი ლარია და მას 41605.52 ლარის
დებიტორული და 27659.67 ლარის კრედიტორული აქვს. კლინიკის საწესდებო კაპიტალი კი 213558 ლარს შეადგენს.
შეგახსენებთ, რომ ეკონომიკისა და მდგრადი განვითარების სამინისტროს მიერ საპრივატიზაციოდ გამოტანილი, ე. წ. არამიანცის კომპლექსში შემავალი 6 კლინიკის მფლობელი დანიელ გუფთა უკვე გახდა. ეკონომიკისა და მდგრადი განვითარების სამინისტროში განმარტავენ, რომ დანიელ გუფთა კომპანია "ამტელ-პროპერტიეს" ერთ-ერთ დირექტორს წარმოადგენს.
დანიელ გუფთამ ეკონომიკისა და მდგრადი განვითარების სამინისტროსგან 330 ათას ლარად "ზოგადი თერაპიის კლინიკა", 740 ათას ლარად შპს "ძმები ზუბალაშვილების სახელობის პედიატრიული კლინიკა", 500 ათას ლარად შპს "თვალის სნეულებათა კლინიკა მზერა", 720 ათას ლარად "გინეკოლოგიური კლინიკა", 55 ათას ლარად "ანესთეზიოლოგიური კლინიკა" და 2 მლნ. 100 ათას ლარად "თორაკო-აბდომინალური კლინიკის" მფლობელიც გახდა.
იმავდროულად, დანიელ გუფთამ ე. წ. არამიანცის კომპლექსის ტერიტორიაზემიწის ნაკვეთები შეიძინა.
დანიელ გუფთამ ე.წ. არამიანცის კომპლექსის ტერიტორიაზე მდებარე 2 მიწის ნაკვეთი, აუქციონის წესით შეიძინა, რომელშიც 1,6 მლნ. ლარი გადაიხადა.
ეკონომიკისა და მდგრადი განვითარების სამინისტროს ინფორმაციით, აუქციონის წესით გაიყიდა თბილისში, წინანდლის ქუჩა №9-ში პირველ სართულზე მდებარე 862,21 კვ.მ. ფართი და მასზე წილობრივად დამაგრებული არასასოფლო-სამეურნეო დანიშნულების მიწის ნაკვეთი.
აღნიშნულ ობიექტში დანიელ გუფთამ 1,2 მლნ. ლარი გადაიხადა. დანიელ გუფთამვე შეიძინა ასევე წინანდლის ქუჩა №9-ში მე-2 სართულზე (ლიტერი „ვ") მდებარე 420 კვ.მ. ფართი და მასზე წილობრივად დამაგრებული არასასოფლო-სამეურნეო დანიშნულების მიწის ნაკვეთი, რომელშიც ბიზნესმენმა 400 ათასი ლარი გადაიხადა.
შეგახსენებთ, რომ ეკონომიკისა და მდგრადი განვითარების სამინისტროს მიერ საპრივატიზაციოდ გამოტანილი, ე. წ. არამიანცის კომპლექსში შემავალი 6 კლინიკის მფლობელი დანიელ გუფთა უკვე გახდა.
