"ადლერის" საკონტროლო-გამშვებ პუნქტზე დაკავებულია 30 წლის ქალი, რიაზანის მაცხოვრებელი, რომელსაც სეპარატისტულ აფხაზეთში ნარკოტიკული ნივთიერების გადატანა ჰქონდა განზრახული.
"რუსეთიდან აფხაზეთის რესპუბლიკაში მიმავალი მოქალაქეების შემოწმებისას "ადლერის" საკონტროლო-გამშვები პუნქტის თანამშრომელთა მიერ ჩატარებული კონტროლის დროს დაკავებულია 30 წლის რუსეთის მოქალაქე ქალი. რიაზანში მაცხოვრებელი ქალის ჩხრეკის შედეგად მისი პალტოს ჯიბეში აღმოჩენილია 1, 58 გრ. ნივთიერება.
ჩატარებული ექსპერტიზის შედეგად დადგინდა, რომ აღმოჩენილი ნივთიერება ნარკოტიკული საშუალება მეტადონია", _ იუწყება აფხაზური მედია.
აღსანიშნავია, რომ "ადლერის" საკონტროლო-გამშვებ პუნქტზე, ამ ფაქტამდე რამდენიმე დღით ადრე ასევე ნარკოტიკების გადატანის მცდელობის გამო დაკავებულ იქნა სოხუმის მაცხოვრებელი ახალგაზრდა ქალი. მასაც მეტადონი გადაჰქონდა.
აღნიშნულ ორივე ფაქტზე სოჭის საბაჟო სამსახურის დაკითხვის განყოფილების მიერ აღძრულია ორი სისხლის სამართლის საქმე "კონტრაბანდის" მუხლით.
