პოლონეთის პრემიერ-მინისტრმა დონალდ ტუსკმა მოქალაქეებს მიმართა და გააფრთხილა, რომ თუ მომავალ წელს დაგეგმილ საპარლამენტო არჩევნებზე ოპოზიციური პარტია „კანონი და სამართლიანობა“ (PiS) პარლამენტში დარჩება, პოლონეთს შესაძლოა ევროკავშირიდან გასვლის საფრთხე დაემუქროს. ამის შესახებ მან სოციალურ ქსელ X-ში დაწერა.
„ან თქვენ გაიყვანთ მათ პარლამენტიდან ერთი წლის შემდეგ, ან ისინი გამოგვიყვანენ ჩვენ ევროკავშირიდან“, - წერს ტუსკი.
პრემიერის განცხადება ოპოზიციური პარტიის ლიდერის, იაროსლავ კაჩინსკის, მიერ ევროკავშირის რეფორმირების შესახებ გაკეთებულ განცხადებებს მოჰყვა. კაჩინსკიმ 28 ოქტომბერს, კრინიცის ფორუმზე გამოსვლისას, განაცხადა, რომ ევროკავშირის ძირეული რეფორმის მცდელობების წარუმატებლობის შემთხვევაში, წევრმა სახელმწიფოებმა შესაძლოა ბლოკიდან გასვლის პირობებზე მოლაპარაკებები დაიწყონ. მისი თქმით, ეს რთული და სარისკო ნაბიჯი იქნებოდა, თუმცა სხვა გზების უშედეგობის შემთხვევაში მისი გამოყენება გამართლებული შეიძლება იყოს.
კაჩინსკის განცხადებას ტუსკის მხრიდან მკვეთრი რეაქცია მოჰყვა. პოლონეთის პრემიერის შეფასებით, ევროკავშირიდან გასვლის საკითხი ქვეყნის პოლიტიკური ბრძოლის ერთ-ერთი მთავარი თემაა.
თავად კაჩინსკიმ ტუსკი განცხადების დამახინჯებაში დაადანაშაულა და განმარტა, რომ მისი პარტიის მიზანი ევროკავშირის დატოვება კი არა, მისი ძირეული რეფორმაა. მან ასევე განაცხადა, რომ ევროკავშირი საჭიროა, თუმცა მნიშვნელოვანი ცვლილებები სჭირდება.
პოლონეთში ევროკავშირიდან გასვლის საკითხი, რომელსაც ხშირად Polexit-ს უწოდებენ, პოლიტიკური დაპირისპირების ერთ-ერთ მთავარ თემად იქცა. ტუსკის პროევროპული მთავრობა კაჩინსკის განცხადებებს ქვეყნის ევროკავშირში წევრობისთვის შესაძლო საფრთხედ აფასებს, PiS კი ამტკიცებს, რომ მისი მიზანი ევროკავშირის რეფორმირება და წევრი სახელმწიფოებისთვის მეტი უფლებამოსილების დაბრუნებაა.
