17 ნოემბრის ღამეს ანექსირებული ყირიმის საოკუპაციო რეიმის წარმომადგენლებმა განაცხადეს, რომ ყირიმის ხიდზე განმეორებითი იერიში განხორციელდა. მომხდარის გამო ხიდზე საავტომობილო მოძრაობა შეჩერებულია.
ყირიმის საოკუპაციო რეიმის ხელმძღვანელის, სერგეი აქსიონოვის განცხადებით, ამ დროისთვის ხიდზე გადაადგილება შეზღუდულია. მან ყირიმის მცხოვრებლებსა და სტუმრებს მოუწოდა, თავი შეიკავონ ხიდის მიმართულებით გადაადგილებისგან და მარშრუტების დაგეგმვისას დაწესებული შეზღუდვები გაითვალისწინონ.
მანამდე ტელეგრამ-არხი „კრიმსკი ვეტერი“ ქერჩის ხიდის მიმდებარე ტერიტორიაზე ძლიერი აფეთქებების შესახებ იუწყებოდა. გამოცხადებული იყო სარაკეტო განგაშიც.
ტელეგრამ-არხის ცნობით, ხიდის სავალი ნაწილის დეფორმაცია მიუთითებს, რომ თაღი ჯერ კიდევ ორშაბათს, დილიდან იყო დაზიანებული. თაღთან ერთად გადაადგილდა დამჭიმავი ბაგირებიც, რის შედეგადაც ხიდის სავალი ნაწილი დეფორმირდა - შუა მონაკვეთი ერთ მხარეს ჩაიზნიქა.
რუსული ტელეგრამარხი Astra კი იუწყება, რომ ყირიმის ხიდზე განხორციელებული დარტყმის შედეგად დაზიანდა ხიდის ორი თაღიდან ერთ-ერთი.
შეგახსენებთ, ორშაბათს დილით ყირიმის ე.წ. ხელისუფლებამ ყირიმის ხიდზე იერიშის შესახებ განაცხადა, რის გამოც ხიდზე საავტომობილო მოძრაობა შეიზღუდა.
ორშაბათს საღამოს რუსეთის ვიცე-პრემიერმა მარატ ხუსნულინმა განაცხადა, რომ ყირიმის ხიდის საავტომობილო მონაკვეთზე მოძრაობა საპირისპირო მიმართულებით, რევერსულ რეჟიმში აღდგა.