ევროკავშირმა რუსეთის რამდენიმე ნავთობგადამამუშავებელი და ნავთობქიმიური საწარმო დაასანქცირა.
ევროკავშირის სანქციების ახალ სიაში რუსეთის რამდენიმე ნავთობგადამამუშავებელი და ნავთობქიმიური საწარმო მოხვდა.
ამის შესახებ ინფორმაცია ევროკავშირის მიერ გამოქვეყნებულ სანქციების სიაშია მოცემული.
„ენერგეტიკის სექტორი, განსაკუთრებით კი ნავთობის ინდუსტრია, რუსეთის ფედერაციის მთავრობისთვის შემოსავლის მნიშვნელოვან წყაროს წარმოადგენს“, - აღნიშნულია დოკუმენტში.
სანქციები შეეხო კომპანია „გაზპრომ ნეფტეხიმ სალავატს“. ეს რუსული კომპანია ბაშკირეთის რესპუბლიკაში ნავთობგადამამუშავებელ ქარხანას აკონტროლებს და ნავთობპროდუქტების წარმოებით არის დაკავებული.
სანქციების სიაში მოხვდა შპს „რუსინვესტიც“, რომელიც ტიუმენის ოლქში ნავთობგადამამუშავებელ ქარხანას აკონტროლებს და ნავთობპროდუქტებს აწარმოებს, ასევე შპს „ვოლხოვ-ეკო“, რომელიც ლენინგრადის ოლქში მდებარე ნავთობგადამამუშავებელ ქარხანას აკონტროლებს.
ევროკავშირის სანქციები შეეხო საწარმოო გაერთიანება „კირიშინეფტეორგსინტეზსაც“, რომელიც ასევე ლენინგრადის ოლქში ნავთობგადამამუშავებელ ქარხანას აკონტროლებს.
კიდევ ერთი კომპანია, „ენისეი“, კომის რესპუბლიკაში მდებარე ქარხანას აკონტროლებს და ნავთობპროდუქტების წარმოებით არის დაკავებული.
სანქციების სიაშია ასევე „გაზპრომნეფტ-მოსკოვის ნავთობგადამამუშავებელი ქარხანა“, რომელიც მოსკოვის ოლქში მდებარე ნავთობგადამამუშავებელ ქარხანას აკონტროლებს. კომპანია „ტაიფ-ენ-კა“ კი თათრეთის რესპუბლიკაში მდებარე ქარხანას აკონტროლებს.
„გაზპრომნეფტ-ომსკის ნავთობგადამამუშავებელი ქარხანა“ ომსკის ოლქში მდებარე ნავთობგადამამუშავებელ ქარხანას ფლობს.
ევროკავშირის სანქციების ქვეშ მოხვდა ხაბაროვსკის ნავთობგადამამუშავებელი ქარხანა და კომპანია „ორსკნეფტეორგსინტეზი“, რომელიც ორენბურგის ოლქში ნავთობპროდუქტებს აწარმოებს.
სანქციების სიაში ასევე მოხვდნენ ილსკის ნავთობგადამამუშავებელი ქარხანა, ნოვოშახტინსკის ნავთობპროდუქტების ქარხანა, „ბალჩუგ-პეტროლეუმი“, სარატოვის ნავთობგადამამუშავებელი ქარხანა და სხვა საწარმოები.
გარდა ამისა, სანქციების სიაში არიან კომპანიები, რომლებიც ენერგორესურსების დაზვერვითა და მოპოვებით არიან დაკავებული, ასევე ის კომპანიები, რომლებიც რუსულ ნავთობსა და ნავთობპროდუქტებს ყიდულობენ, ტრანსპორტირებენ და ყიდიან.
ცნობისათვის, 16 ნოემბერს ევროკავშირის საბჭომ რუსეთის მიერ უკრაინის წინააღმდეგ ომის დაფინანსებაში მათი როლის გამო სანქციები დაუწესა 12 ფიზიკურ პირსა და 101 ორგანიზაციას. სანქციების პაკეტი მოიცავს რუსეთის უმსხვილესი საცალო ვაჭრობის კომპანიის, Wildberries-ის ერთადერთ აქციონერს და პირს, რომელიც კიდევ ერთი მსხვილი რუსული ელექტრონული კომერციის კომპანიის, Ozon-ის საკონტროლო პაკეტს ფლობს.
ევროკავშირის წევრი ქვეყნების საგარეო საქმეთა მინისტრებმა რუსეთის წინააღმდეგ სანქციების სიების გაფართოება შეათანხმეს. სიაში 145 ფიზიკური და იურიდიული პირი მოხვდა. სანქციები, მათ შორის, Wildberries-ის ხელმძღვანელს, ტატიანა კიმს შეეხო.