აშშ-ის პრეზიდენტის, დონალდ ტრამპის განცხადებით, ჩინეთის პრეზიდენტ სი ძინპინთან და რუსეთის პრეზიდენტ ვლადიმირ პუტინთან დაგეგმილ შეხვედრაზე უკრაინაში მიმდინარე ომის საკითხსაც განიხილავს.
„სი ძინპინთან და პუტინთან ჩემს საყვარელ თემაზე, უკრაინაზე ვისაუბრებთ“, - განაცხადა ტრამპმა ჟურნალისტებთან საუბრისას.
აშშ-ის პრეზიდენტი ჩინეთში აზია-წყნარი ოკეანის ეკონომიკური თანამშრომლობის (APEC) სამიტის ფარგლებში მიემგზავრება. სამმხრივი შეხვედრა 19 ნოემბერს, ჩინეთის ქალაქ შენჟენშია დაგეგმილი.
მანამდე თეთრი სახლის წარმომადგენლები აცხადებდნენ, რომ სამმხრივი შეხვედრის მთავარი თემა ბირთვული იარაღის არსენალის შემცირება და ბირთვული განიარაღება იქნებოდა და უკრაინაში ომის საკითხის განხილვა დღის წესრიგში არ იგეგმებოდა.
მანამდე, რუსეთის პრეზიდენტის თანაშემწემ, იური უშაკოვმა განაცხადა, რომ ვლადიმერ პუტინი და დონალდ ტრამპი ჩინეთში შეხვედრაზე უკრაინის საკითხს განიხილავენ.
„რა თქმა უნდა, განხილული იქნება უკრაინის საკითხი, მისი მოგვარება, შესაბამისი ამერიკული და რუსული წინადადებები და იდეები“, - განაცხადა უშაკოვმა.
მისი თქმით, ქალაქ შენჟენში, რუსეთისა და აშშ-ის პრეზიდენტებს, ვლადიმირ პუტინსა და დონალდ ტრამპს შორის ორმხრივი შეხვედრის გამართვის საკითხზე მუშაობა მიმდინარეობს.
„შემიძლია 100%-ით ვთქვა, რომ რადგან პუტინი და დონალდ ტრამპი შენჟენში იქნებიან, ისინი იქ ერთმანეთს შეხვდებიან“, - აღნიშნა უშაკოვმა.