აშშ-ის სახელმწიფო მდივანმა მარკო რუბიომ უარყო გავრცელებული ინფორმაცია, რომ დონალდ ტრამპის ადმინისტრაციის დატოვებას აპირებს.
ამის შესახებ რუბიომ The New York Times-თან ინტერვიუში ისაუბრა.
„პრეზიდენტ ტრამპთან მისი საპრეზიდენტო ვადის ბოლომდე მუშაობა ყოველთვის იყო ჩემი გეგმა. სიმართლე გითხრათ, არ ვიცი, საიდან ჩნდება ეს ხმები. მომწონს ის საქმე, რასაც ვაკეთებ. თან ყოველთვის მეცინება, როდესაც ამბობენ, რომ სამსახურიდან წასვლას ვაპირებ. ვეკითხები: კონკრეტულად რომელი სამსახურიდან?“ - განაცხადა რუბიომ.
ამასთან, აშშ-ის სახელმწიფო მდივანმა უარი თქვა, ესაუბრა იმის შესახებ, განიხილავს თუ არა 2028 წელს საპრეზიდენტო არჩევნებში მონაწილეობას.
„2028 წელზე აღარ ვისაუბრებ. უბრალოდ, აღარ გავაკეთებ ამას“, - აღნიშნა მან.
რუბიოს შესაძლო გადადგომის შესახებ ინფორმაცია მას შემდეგ გავრცელდა, რაც მედიაში გამოჩნდა ცნობები, რომ ტრამპის ადმინისტრაციის რამდენიმე მაღალჩინოსანი 2028 წლის საპრეზიდენტო არჩევნებისთვის მზადების მიზნით თანამდებობების დატოვებას განიხილავდა.
Bloomberg-ის ინფორმაციით, რუბიო ადმინისტრაციიდან წასვლის საკითხზე თეთრი სახლის წარმომადგენლებსაც ესაუბრა, თუმცა მას დარჩენა სთხოვეს. სახელმწიფო დეპარტამენტის წარმომადგენელმა ეს ინფორმაცია უარყო და Bloomberg-ის პუბლიკაციას „სრულიად გამოგონილი“ უწოდა.
რუბიო ამჟამად სახელმწიფო მდივნის გარდა, აშშ-ის პრეზიდენტის ეროვნული უსაფრთხოების მრჩევლის თანამდებობასაც იკავებს.
