უკრაინის პრეზიდენტმა ვოლოდიმირ ზელენსკიმ ბერლინის უსაფრთხოების კონფერენციაზე გამოსვლისას განაცხადა, რომ რუსეთი მშვიდობიან და ერთიან ევროპას საკუთარ მტრად მიიჩნევს და ბოლო წლებში შექმნილი მისი სამხედრო ინფრასტრუქტურა მხოლოდ უკრაინის წინააღმდეგ არ არის მიმართული.
„ვხედავთ, რომ რუსეთმა უკვე მიიღო გადაწყვეტილება. მან გადაწყვიტა, რომ მშვიდობიანი და ერთიანი ევროპა მისი მტერია. ეს ვითარება ერთი წლის შემდეგ თავისთავად არ გაქრება. შეხედეთ სამხედრო ინფრასტრუქტურას, რომელსაც რუსეთი ბოლო წლებში ავითარებდა. ნუთუ ეს ყველაფერი მხოლოდ უკრაინისთვის არის? ეს მასშტაბები მეტისმეტად დიდია იმისთვის, რომ მხოლოდ უკრაინას ეხებოდეს. ეს თქვენ წინააღმდეგ არის მიმართული“, - განაცხადა ზელენსკიმ.
უკრაინის პრეზიდენტის თქმით, კარგია, რომ მსოფლიოში არსებობენ სხვა ქვეყნებიც, რომლებიც ამჟამად ევროპას უსაფრთხოების წყაროდ განიხილავენ.
„ჯერჯერობით, ეს ბევრ ასპექტში მხოლოდ პოტენციური შესაძლებლობაა, თუმცა მას შეუძლია, ძალიან ძლიერი გახდეს“, - აღნიშნა ზელენსკიმ.
მისივე თქმით, ჯერ კიდევ არსებობს შანსი, რომ შეერთებული შტატები დარჩეს იმ უსაფრთხოების ალიანსის ნაწილად, რომელსაც ევროპისთვის უდიდესი მნიშვნელობა აქვს.
„ჩვენთვის, უკრაინაში, ვითარება ახლა უკიდურესად რთულია. თუმცა უკრაინა არასდროს დანებდება. უკრაინა ყოველთვის ძლიერი იქნება და უკრაინა ყოველთვის ევროპული იქნება. მაგრამ რა იქნება აქ?“ - განაცხადა უკრაინის პრეზიდენტმა.
ზელენსკის განცხადებით, შესაძლოა, შეერთებული შტატების როლი მსოფლიოში კიდევ უფრო შემცირდეს, რის გამოც ევროპის გავლენა უნდა გაიზარდოს. მისი თქმით, ამ პროცესში გერმანიას განსაკუთრებული მნიშვნელობა აქვს.
„შესაძლოა, შეერთებული შტატების როლი მსოფლიოში კიდევ უფრო შემცირდეს. ამიტომ ევროპის როლი მსოფლიოში კიდევ უფრო უნდა გაიზარდოს. გერმანიის გარეშე ეს შეუძლებელია. შეუძლებელია. თქვენს გარეშე თავისუფლება გარდაუვლად დამარცხდება. ევროპაში თავისუფლება და უსაფრთხოება თქვენი ნებისყოფისა და ძალის გარეშე შეუძლებელია. გერმანიას ევროპაში ალტერნატივა არ ჰყავს“, - განაცხადა უკრაინის პრეზიდენტმა.
ვოლოდიმირ ზელენსკი ბერლინში 3 ნოემბერს ჩავიდა.
