კანადის პრემიერ-მინისტრმა მარკ კარნიმ განაცხადა, რომ კანადასა და ევროკავშირს შორის ურთიერთობების დაახლოება დადებითი პროცესია და ოტავა ამ ურთიერთობებზე უარის თქმის მიზნით ზეწოლას არ დაექვემდებარება.
ამის შესახებ კარნიმ ჟურნალისტებთან საუბრისას განაცხადა. იუწყება Politico.
კარნის განცხადება მას შემდეგ გაკეთდა, რაც აშშ-ის პრეზიდენტმა დონალდ ტრამპმა განაცხადა, რომ თუ კანადა ევროკავშირის ასოცირებული წევრი გახდება, შესაძლოა, ევროკავშირის წინააღმდეგ „მძიმე ტარიფები“ დააწესოს.
„ეს პარტნიორობა დადებითი პროცესია. ეს არის ჩემი პასუხი ამერიკის პრეზიდენტს“, - განაცხადა კანადის პრემიერ-მინისტრმა.
მისი თქმით, „უფრო ძლიერი და მდგრადი კანადა შეერთებული შტატებისთვის უფრო ეფექტური პარტნიორი გახდება“.
„კანადელები ერთიანები არიან იმაში, რომ ვერავინ გვიკარნახებს, რომელ ენაზე ვისაუბროთ. ვერავინ გვიკარნახებს ჩვენს კულტურას ან იმას, ვისთან შეგვიძლია შეთანხმებების გაფორმება“, - აღნიშნა კარნიმ.
შეგახსენებთ, რომ 16 სექტემბერს ევროკომისიის პრეზიდენტმა ურსულა ფონ დერ ლაიენმა განაცხადა, რომ მარკ კარნისთან თანამშრომლობა სურს, რათა კანადას ევროკავშირის პირველი ასოცირებული წევრი გახდომის შესაძლებლობა მიეცეს.
კარნიმ განაცხადა, რომ ოტავა ევროპასთან „ღრმა პარტნიორობით“ არის დაინტერესებული.
