უკრაინამ პარტნიორებს მიაწოდა ინფორმაცია იმის შესახებ, რომ რუსეთი დასავლეთის ქვეყნებში წარმოებულ კომპონენტებს ბალისტიკური რაკეტებისა და დრონების დასამზადებლად იყენებს. უკრაინის საგარეო საქმეთა მინისტრი ანდრი სიბიჰა პარტნიორებს მოუწოდებს, რუსეთის მიერ უკრაინაზე ყოველი მასშტაბური თავდასხმის შემდეგ ახალი სანქციები დააწესონ.
ამის შესახებ სიბიჰამ კიევში, პოლონეთის საგარეო საქმეთა მინისტრ რადოსლავ სიკორსკისთან ერთობლივ ბრიფინგზე განაცხადა.
მისი თქმით, პარტნიორები დიდი სასანქციო პაკეტების მიღებას არ უნდა დაელოდონ და რუსეთის წინააღმდეგ შესაბამისი ზომები ყოველი მასშტაბური იერიშის შემდეგ მიიღონ.
„ჩვენ კიდევ ერთხელ განვიხილეთ მიდგომა, რომლის მიხედვითაც არ უნდა დაველოდოთ დიდ სასანქციო პაკეტებს და უკრაინაზე რუსეთის ყოველი მასშტაბური თავდასხმის შემდეგ აგრესორის, რუსეთის წინააღმდეგ შესაბამისი სანქციების პაკეტები უნდა მივიღოთ, მათ შორის, „ანტიბალისტიკური პაკეტი“, - განაცხადა სიბიგამ.
უკრაინის საგარეო საქმეთა მინისტრის განცხადებით, პარტნიორებმა რუსეთს ბალისტიკური იარაღისა და დრონების წარმოების შესაძლებლობა უნდა შეუზღუდონ და სამხედრო ტექნოლოგიებზე წვდომა უნდა დაუბლოკონ.
„რუსეთმა, სამწუხაროდ, სანქციებისთვის გვერდის ავლა ისწავლა. სამწუხაროდ, რუსეთი კვლავ იყენებს დასავლეთის ქვეყნებსა და ევროპის ქვეყნებში წარმოებულ კომპონენტებს როგორც ბალისტიკური რაკეტების, ისე დრონების დასამზადებლად. ეს ინფორმაცია ჩვენ ევროპელ პარტნიორებს მივაწოდეთ“, - განაცხადა სიბიჰამ.
