უკრაინის პრეზიდენტმა ეროვნული უსაფრთხოებისა და თავდაცვის საბჭოს გადაწყვეტილებით გათვალისწინებული სანქციები რიგი პირების წინააღმდეგ დააწესა.
სანქცირებულთა სიაშია უკრაინის მოქალაქე იულია მენდელი.
უკრაინის პრეზიდენტის ვებგვერდის ინფორმაციით, ზელენსკიმ ხელი მოაწერა სამ განკარგულებას, რომლითაც ძალაში შევიდა ეროვნული უსაფრთხოებისა და თავდაცვის საბჭოს გადაწყვეტილებები სანქციების დაწესების შესახებ. სანქციები შეეხო რუსეთის „ჩრდილოვანი ფლოტის“ გემებს, რუსეთის სახელმწიფო კორპორაცია „როსტეხთან“ დაკავშირებულ საწარმოებსა და პირებს, ასევე პროპაგანდისტებს, რომლებიც რუსეთის აგრესიას ამართლებენ.
სანქციების სიაში მოხვდა 20 გემი, რომელსაც რუსეთი ნავთობის, ნავთობპროდუქტებისა და თხევადი გაზის ექსპორტისთვის იყენებს.
ერთ-ერთი გადაწყვეტილებით სანქციები დაუწესდა რუსეთის 29 მოქალაქესა და 29 რუსულ კომპანიას. მათ შორის არიან საწარმოები, რომლებიც ჩართული არიან ზუსტი სამრეწველო მოწყობილობების, ელექტრონიკისა და რაკეტებისა და დრონების წარმოებისთვის საჭირო კომპონენტების მიწოდების ჯაჭვებში.
სანქციები ასევე შეეხო ორმაგი დანიშნულების პროდუქციის მწარმოებელ საწარმოებს, სამეცნიერო-კვლევით ორგანიზაციებს, რომლებიც რუსეთის სამხედრო-სამრეწველო კომპლექსისთვის ტექნიკურ დოკუმენტაციას ამზადებენ, ასევე სასწავლო დაწესებულებას, რომელიც სპეციალისტებს რუსეთის კონცერნ „კალაშნიკოვის“ საწარმოებისთვის ამზადებს.
შეზღუდვები დაუწესდა იმ კომპანიებსაც, რომლებიც რუსეთის სამხედრო-სამრეწველო კომპლექსის საწარმოებისთვის ტექნოლოგიურ გადაწყვეტილებებსა და მაღალტექნოლოგიურ აღჭურვილობას ამუშავებენ და აწვდიან, ასევე IT კომპანიებს, რომლებიც ინფორმაციის დაშიფვრის, მონაცემთა ბაზების შეგროვებისა და მართვის პროგრამულ პროდუქტებს ქმნიან და ემსახურებიან.
„კიდევ ერთი გადაწყვეტილებით, შეზღუდვები დაუწესდა რუსეთისა და უკრაინის 10 მოქალაქეს, რომლებიც დეზინფორმაციასა და რუსულ პროპაგანდას ავრცელებენ და რუსეთის აგრესიულ პოლიტიკას უჭერენ მხარს. მათ შორისაა იულია მენდელიც“, - ნათქვამია განცხადებაში.
აღნიშნულია, რომ უკრაინა სანქციების საერთაშორისო დონეზე სინქრონიზაციის მიზნით პარტნიორებს ყველა შესაბამის ინფორმაციას გადასცემს.
ცნობისთვის: იულია მენდელი ზელენსკის პრესმდივნის თანამდებობას 2019 წლის 3 ივნისიდან 2021 წლის 9 ივლისამდე იკავებდა. თანამდებობიდან გათავისუფლების შემდეგ მან პრეზიდენტისა და მისი გუნდის მისამართით არაერთი საკამათო განცხადება გააკეთა.
2026 წლის მაისში, ტაკერ კარლსონთან ინტერვიუში, იულია მენდელი ამტკიცებდა, რომ 2022 წლის გაზაფხულზე სტამბოლში გამართულ მოლაპარაკებებზე უკრაინის დელეგაცია, ომის დასრულების სანაცვლოდ, თითქოს მზად იყო რუსეთის ყველა მოთხოვნას დათანხმებოდა. ამის დასტურად მას მხოლოდ ანონიმურ პირებთან საუბრები მოჰყავდა. მენდელმა, სხვა საკითხებთან ერთად, ზელენსკი ფულის გათეთრებასა და კლუბებში ნარკოტიკების მოხმარებაში დაადანაშაულა.
მენდელი ასევე აცხადებდა, რომ პრეზიდენტის ადმინისტრაციის ყოფილი ხელმძღვანელი ანდრი ერმაკი მაგიით იყო დაკავებული.
მან ერმაკს „ძალიან საშიში ადამიანი“ უწოდა და განაცხადა, რომ საკუთარი სიცოცხლის ეშინოდა. ამასთან, მენდელი ზოგადი განცხადებებით შემოიფარგლა, საუბრობდა „საკუთარ გამოცდილებასა“ და „კავშირებზე“, თუმცა მისი სიტყვების დასადასტურებლად კონკრეტული ფაქტები არ მოუყვანია.
