13 სექტემბერს, დილით, რუსულმა დრონმა პოლონეთის საზღვართან, "იაგოდინის" სადგურზე, ლოკომოტივი დააზიანა. თავდასხმის დეტალები კომპანია „უკრინის რკინიგზამ“ გაავრცელა.
კომპანიის ინფორმაციით, ლოკომოტივზე თავდასხმამდე ცოტა ხნით ადრე უკრაინა-პოლონეთის საზღვარზე დიპლომატიური მატარებელი იმყოფებოდა. მის მგზავრებს შორის იყვნენ ევროკავშირის რამდენიმე ქვეყნის უსაფრთხოების საკითხებზე მრჩევლები და ყოფილი ევროპელი ლიდერები, მათ შორის, დიდი ბრიტანეთის ყოფილი პრემიერ-მინისტრი ბორის ჯონსონი. ამასთან, თავდასხმის დროს იმავე სადგურზე მყოფი სხვა მატარებლით აშშ-ის ცენტრალური სადაზვერვო სააგენტოს ყოფილი დირექტორი დევიდ პეტრეუსი მგზავრობდა.
როგორც „უკრინის რკინიგზა" იუწყება, რეაქტიული დრონი ცენტრალური მონიტორინგის ჯგუფის დისპეტჩერმა აღმოაჩინა. მატარებლის მგზავრებმა ევაკუაციის შესახებ შეტყობინება დარტყმამდე დაახლოებით 15 წუთით ადრე მიიღეს.
„სავსებით შესაძლებელია, რომ ამ რუსული დრონის სამიზნე დიპლომატიური მატარებელიც ყოფილიყო, რომელმაც სადგური დაგეგმილზე ადრე დატოვა. გადაწყვეტილება მატარებლის მოძრაობის გრაფიკის გადახედვის ფარგლებში, რეალურ დროში მიიღეს, რადგან რუსეთის მხრიდან დარტყმების მუდმივი საფრთხე არსებობს“, - აცხადებენ „უკრაინის რკინიგზაში“.
მათივე ინფორმაციით, მატარებლების მოძრაობის განრიგი მუდმივად კორექტირდება იმის მიხედვით, რომელი სარკინიგზო მონაკვეთებია ხელმისაწვდომი და რომელი - დაბლოკილი დაბომბვების გამო.
„უკრაინის რკინიგზა“ ასევე მოუწოდებს მგზავრებს, მკაფიოდ და დაუყოვნებლივ შეასრულონ რკინიგზის თანამშრომლების ყველა მითითება უსაფრთხოების ზომებთან დაკავშირებით.
13 სექტემბერს რუსეთმა უკრაინაში, პოლონეთის საზღვრიდან ორ კილომეტრში, სამგზავრო მატარებლის ლოკომოტივი დაბომბა. „უკრაინის რკინიგზის“ ხელმძღვანელის, ოლექსანდრ პერცოვსკის განცხადებით, რუსეთი უკვე მეორე დღეა, უწყვეტად უტევს უკრაინის სარკინიგზო ინფრასტრუქტურას, მათ შორის, დეპოებს, სადგურებსა და მატარებლებს. მისივე თქმით, თავდასხმის შედეგად არავინ დაშავებულა.
