რუსეთის პრეზიდენტის თანაშემწემ იური უშაკოვმა განაცხადა, რომ აბუ-დაბის მემკვიდრე პრინცმა ვლადიმირ პუტინს დაუდასტურა, რომ არაბთა გაერთიანებული საამიროები მზად არის, უკრაინასთან დაკავშირებით მოლაპარაკებებისთვის საკუთარი ტერიტორია შესთავაზოს.
უშაკოვის თქმით, რუსული მხარისთვის მოლაპარაკებების გამართვა არაბთა გაერთიანებულ საამიროებში „სავსებით მისაღები“ ვარიანტია.
მანამდე აშშ-ის პრეზიდენტის სპეციალურმა წარმომადგენელმა ჯარედ კუშნერმა განაცხადა, რომ სამშვიდობო შეთანხმება თითქმის სრულად არის შეთანხმებული. მისი თქმით, აშშ იმედოვნებს, რომ რუსეთ-უკრაინის ომთან დაკავშირებით სამმხრივი მოლაპარაკებები გაიმართება, თუმცა აღიარებს, რომ მხარეებს საერთო ხედვა ჯერ არ აქვთ.
კუშნერის განცხადებით, ყველაზე რთულ საკითხად კვლავ ტერიტორიული საკითხი რჩება. მან იმედი გამოთქვა, რომ მომდევნო რამდენიმე კვირაში შესაძლებელი გახდება იმის გამოცხადება, თუ რა იქნება შემდეგი ნაბიჯები.
ამასთან, უკრაინის პრეზიდენტის ოფისის ხელმძღვანელმა კირილო ბუდანოვმა განაცხადა, რომ სამშვიდობო მოლაპარაკებების შემდეგი რაუნდის ჩატარება ოქტომბერში იგეგმება. მისი თქმით, საუბარია მოლაპარაკებების სამმხრივ ფორმატზე, თუმცა პოტენციური შეხვედრის ადგილი მას არ დაუკონკრეტებია.
