რუსეთის პრეზიდენტმა ვლადიმირ პუტინმა უკრაინის პრეზიდენტ ვოლოდიმირ ზელენსკის შეთავაზება, ომის დასრულების საკითხზე მოლაპარაკებები აშშ-ში, „დიდი ოცეულის“ (G20) სამიტის ფარგლებში გამართონ, უარყო.
ამის შესახებ კრემლის პრესსპიკერმა, დმიტრი პესკოვმა განაცხადა. იუწყება France24
უკრაინის პრეზიდენტმა განაცხადა, რომ მზად არის, მაიამიში G20-ის სამიტს დაესწროს და პუტინს შეხვდეს, თუ რუსეთის პრეზიდენტიც მიიღებს სამიტში მონაწილეობას.
თუმცა კრემლის პრესსპიკერმა ასეთი შეხვედრის შესაძლებლობა მაშინვე გამორიცხა და მას „შეუძლებელი“ უწოდა. პესკოვის განცხადებით, პუტინი ზელენსკისთან შეხვედრისთვის მზად მხოლოდ რუსეთის დედაქალაქში - მოსკოვშია.
კითხვაზე, განიხილავს თუ არა კრემლი ზელენსკისთან შეხვედრისთვის მოსკოვის გარდა სხვა ადგილს, პესკოვმა უპასუხა: „მასთან შეხვედრის მზადყოფნა მოსკოვში გვაქვს“.
თავის მხრივ, ზელენსკიმ გერმანელ ჟურნალისტებთან საუბრისას განაცხადა, რომ თუ სამიტზე ორივე ლიდერს მიიწვევენ, მზად არის მოლაპარაკებებისთვის.
„ჩვენ უნდა ჩავიდეთ. უნდა შევხვდეთ, ვისაუბროთ და გადაწყვეტილება მივიღოთ. საქმე სიტყვებში არ არის. რას ვეტყვი მას ან რისი თქმა მოუნდება მას ჩემთვის - ამას მნიშვნელობა არ აქვს. ერთადერთი, რასაც მნიშვნელობა აქვს, შედეგია“, - განაცხადა ზელენსკიმ.
შესაძლო დიპლომატიური კონტაქტების წინ უკრაინის პოზიციის შეფასებისას ზელენსკიმ აღნიშნა, რომ უკრაინა ახლა ბრძოლის ველზე გაცილებით ძლიერია, ვიდრე გასულ წელს. სწორედ ამიტომ, უკრაინის ხელისუფლება მიიჩნევს, რომ ამჟამინდელი ვითარება მოლაპარაკებების დასაწყებად ხელსაყრელია.
ამ დროისთვის პუტინის მიერ დეკემბერში დაგეგმილ G20-ის სამიტში მონაწილეობის შესახებ ოფიციალური დადასტურება არ არსებობს.
