ბულგარეთში, სოფელ ცარევა ლივადასთან, უკრაინისთვის იარაღის მიმწოდებელი კომპანია EMCO-ს საბრძოლო მასალების საწყობში ხანძარი გაჩნდა. იუწყება Deutsche Welle
ხანძარი, პოლიციის ინფორმაციით, 11 სექტემბრის საღამოს გაჩნდა.
ხანძრის შედეგად მიყენებული ზარალის მასშტაბი ჯერჯერობით უცნობია. დაღუპულთა ან დაშავებულთა შესახებ ინფორმაცია არ გავრცელებულა.
ადგილობრივმა პოლიციამ ჟურნალისტებთან განაცხადა, რომ ამ დროისთვის მოსახლეობისთვის საფრთხე არ არსებობს.
კომპანია EMCO-ს წარმომადგენლებმა ინციდენტის შესაძლო მიზეზად ადამიანური შეცდომა გამორიცხეს. ბულგარეთის შინაგან საქმეთა მინისტრმა ივან დემერჯიევმა განაცხადა, რომ შემთხვევის გამოძიება დაიწყო.
„ჩვენ გავაანალიზებთ ამ კომპანიის საწყობებში, ასევე სხვა საწარმოებში მომხდარ მსგავს ხანძრებს, რათა დავადგინოთ, არსებობს თუ არა მათ შორის კავშირი ან რაიმე საერთო კანონზომიერება“, – განაცხადა ბულგარეთის შს მინისტრმა.
EMCO-ს საწარმოო ობიექტების ხელმძღვანელმა სლავჩო დიმიევმა ჟურნალისტებთან საუბრისას აღნიშნა, რომ იარაღის წარმოებასთან დაკავშირებული ობიექტების დაცვის მიზნით უსაფრთხოების დამატებითი ზომების შემოღების საკითხიც უნდა განიხილონ.
„თუ საბოლოოდ დადგინდება, რომ იარაღთან დაკავშირებული ობიექტები დივერსიის სამიზნე გახდა, ეს მხოლოდ კონკრეტულ კომპანიაზე თავდასხმა არ იქნება - ეს ეროვნულ ინტერესებზე თავდასხმა იქნება“, - განაცხადა დიმიევმა.
