აშშ-ის პრეზიდენტმა დონალდ ტრამპმა განაცხადა, რომ ირანთან ომის დაწყებას არ ნანობს და შესაძლებლობა რომ ჰქონდეს, იგივე გადაწყვეტილებას მიიღებდა.
„მე სიტყვა „სინანულის“ არ მჯერა. შეიძლება, საკუთარ თავს ყოველთვის ცოტა რამ ჰკითხო, მაგრამ ყველაფერი თავიდან რომ მქონდეს გასაკეთებელი, ზუსტად იმავეს გავაკეთებდი“, - განაცხადა ტრამპმა Fox News-თან ინტერვიუში.
ტრამპის თქმით, მას მიაჩნია, რომ ირანის წინააღმდეგ სამხედრო მოქმედებებით თეირანის ბირთვული შესაძლებლობები მნიშვნელოვნად გაანადგურა. მან აღნიშნა, რომ მისი მხარდამჭერები ომის გამო დემორალიზებულები არ არიან და, პირიქით, ამაყობენ იმით, რომ მისი ადმინისტრაცია ირანს ბირთვული იარაღის მოპოვების შესაძლებლობას არ აძლევს.
„არა მგონია, რომ ისინი დემორალიზებულები იყვნენ. ვფიქრობ, ისინი ძალიან ამაყობენ იმით, რომ ირანს ბირთვული იარაღის ქონის უფლებას არ ვაძლევ“, - განაცხადა აშშ-ის პრეზიდენტმა.
ტრამპმა ასევე გაიმეორა, რომ მისი შეფასებით, ირანთან ომი აშშ-ის ნოემბრის შუალედური არჩევნების შემდეგ მალევე დასრულდება.
„ის არჩევნების შემდეგ დაუყოვნებლივ დასრულდება“, - განაცხადა მან.
ტრამპის თქმით, ირანი ცდილობს გავლენა მოახდინოს აშშ-ის არჩევნებზე, რადგან თეირანს, მისი შეფასებით, იმედი აქვს, რომ დემოკრატები ხელისუფლებაში დაბრუნდებიან და ირანს ბირთვული იარაღის შექმნის შესაძლებლობას მისცემენ.
Fox News-ის ცნობით, აშშ-ისა და ისრაელის მიერ ირანის წინააღმდეგ დაწყებული ერთობლივი ოპერაციის გამო ნავთობისა და საწვავის ფასების ზრდა შუალედური არჩევნების წინ რესპუბლიკელებისთვის ერთ-ერთ მთავარ პრობლემად იქცა. როგორც „ფოქს ნიუსის“ წამყვანმა, ლორა ინგრემმა აღნიშნა, რომ არა ირანის ომი, რესპუბლიკელები შუალედურ არჩევნებში „გარანტირებულად, ყოველგვარი დაბრკოლების გარეშე გაიმარჯვებდნენ, რადგან ბენზინი 2.25 დოლარი ღირდა“. დონალდ ტრამპმა კი საპასუხოდ აღნიშნა: „ეს მხოლოდ ვარაუდია“.
