აშშ-ის ცენტრალური სადაზვერვო სააგენტოს (CIA) დირექტორი ჯონ რეტკლიფი რუსეთსა და უკრაინას შორის მოლაპარაკებებში უფრო აქტიურ როლს მოირგებს. ამის შესახებ Financial Times წყაროენზე დაყრდნობით წერს.
გამოცემის ცნობით, თეთრი სახლი განიხილავს სპეციალური წარმომადგენლის, სტივ უიტკოფისა და დონალდ ტრამპის სიძის ჯარედ კუშნერის, მოლაპარაკებებში ჩართულობის შემცირებას. სწორედ ისინი ხელმძღვანელობდნენ ამ დრომდე მოსკოვსა და კიევს შორის აშშ-ის დიპლომატიას.
წყაროების ინფორმაციით, რეტკლიფთან დაახლოებულმა პირებმა ევროპელ კოლეგებს განუცხადეს, რომ CIA-ს დირექტორი რუსეთსა და უკრაინას შორის მოლაპარაკებების პროცესში შუამავლის როლს უფრო აქტიურად შეასრულებს. ამასთან, ის ორივე ქვეყნის სადაზვერვო სამსახურებთან კონტაქტებსაც შეინარჩუნებს.
თუმცა, გამოცემის ცნობით, საბოლოო გადაწყვეტილება დონალდ ტრამპს ჯერ არ მიუღია. თეთრმა სახლმა და CIA-მ საკითხზე კომენტარის გაკეთებისგან თავი შეიკავეს.
რეტკლიფის როლის შესაძლო გაძლიერება მას შემდეგ განიხილება, რაც აშშ-ის სამშვიდობო ძალისხმევამ მნიშვნელოვანი შედეგი ვერ მოიტანა. მანამდე CIA-ს დირექტორი მოსკოვშიც იმყოფებოდა, სადაც რუსი სადაზვერვო უწყებების წარმომადგენლებს შეხვდა.
ორი წყაროს ინფორმაციით, აშშ-ში მოლაპარაკებების გუნდში ცვლილებებზე ფიქრი ჯერ კიდევ თებერვლის ბოლოს დაიწყეს, მას შემდეგ, რაც სამშვიდობო შეთანხმების მიღწევის წინა მცდელობები ჩავარდა. პროცესი მაშინ შეჩერდა, რადგან ტრამპის ადმინისტრაციამ ყურადღება ირანის ომზე გადაიტანა, რომელიც უკრაინის საკითხზე მოლაპარაკებების ბოლო რაუნდის დასრულებიდან მალევე დაიწყო.
გამოცემის მიხედვით, ტრამპის ახლო მეგობარი სტივ უიტკოფი, სავარაუდოდ, სამშვიდობო საკითხებში სპეციალურ წარმომადგენლად დარჩება და, მათ შორის, ახლო აღმოსავლეთის მიმართულებით მუშაობას გააგრძელებს. პარალელურად, გარკვეული პერიოდის განმავლობაში ის შესაძლოა უკრაინის საკითხზეც მუშაობდეს ჯონ რეტკლიფთან ერთად.
ორი წყაროს ცნობით, რეტკლიფსა და უიტკოფს შორის ამჟამად „გავლენისთვის ბრძოლა“ მიმდინარეობს - ვინ რა მიმართულებას ჩაიბარებს.
FT-ის წყაროების მიხედვით, უიტკოფის მუშაობის თავისუფალი სტილი როგორც რუსეთსა და უკრაინას, ისე კიევის მოკავშირეებს აღიზიანებდა. უკრაინაში მიიჩნევენ, რომ უიტკოფი პუტინზე საკმარის ზეწოლას ვერ ახდენდა, რათა რუსეთის პრეზიდენტს მოთხოვნები შეერბილებინა. მოსკოვში კი, პირიქით, უიტკოფს ნაწილობრივ ადანაშაულებენ გასულ წელს ალასკაზე ტრამპისა და პუტინის სამიტის ჩაშლაში.
წყაროების ინფორმაციით, პუტინი უიტკოფის ძალისხმევას დადებითად აფასებდა, თუმცა კრემლი, სავარაუდოდ, მიანიშნებდა, რომ აშშ-ის მხრიდან ახალი მიდგომის წინააღმდეგი არ იქნებოდა.
ამასთან, თეთრი სახლი ჯერ კიდევ გაზაფხულზე განიხილავდა მოსკოვში ახალი ელჩის დანიშვნას, რათა რუსეთთან კომუნიკაციის კიდევ ერთი არხი გაეხსნა.
