„დონბასში დაკავებული პოზიციები“ უკრაინის ფორპოსტია არაერთი მიმართულებით, -ამის შესახებუკრაინის პრეზიდენტმა ვოლოდიმირ ზელენსკიმ კიევში აშშ-ის პრეზიდენტის სპეციალურ წარმომადგენლებთან, ჯარედ კუშნერთან და სტივ უიტკოფთან, ერთობლივ პრესკონფერენციაზე განაცხადა.
„დონბასის საკითხი - მთელი პატივისცემით ვამბობ ჩვენი მოქალაქეების მიმართ, რომლებიც დონბასში ცხოვრობენ ან იქიდან იძულებით წავიდნენ... დონბასის საკითხი მხოლოდ დონბასის საკითხი არ არის. მე მიმაჩნია, რომ ეს ამ ომის მთავარი საკითხია. როგორც გადარჩენისთვის, ისე გამოფიტვის ომის. ეს ტერიტორიული საკითხია, რომელიც რუსეთის მხარის მიზანს წარმოადგენს. და, სხვათა შორის, ნათელია, რომ ის უკრაინის ერთგვარი ფორპოსტია არაერთ საკითხში“, - განაცხადა ზელენსკიმ.
მისივე თქმით, უკრაინამ ბრძოლის ველზე, მათ შორის ქვეყნის აღმოსავლეთ ნაწილში, თავისი პოზიციები გაამყარა.
„იქ, სადაც მტერი აქტიურია. იქ, სადაც მან სამხედროების რაოდენობა გაზარდა. იქ, სადაც, ჩემი აზრით, რუსეთში არჩევნების შემდეგ მობილიზაცია სწორედ ამ მიმართულებისთვის გამოცხადდება. ანუ იქ ბევრი გეოპოლიტიკური საკითხი წყდება. რეალურად“, - განაცხადა ზელენსკიმ.
ამასთან, მისი თქმით, უკრაინელი დამცველები დიდ საქმეს აკეთებენ, რადგან დიპლომატიის შესაძლებლობას ქმნიან.
„ბრძოლის ველზე ძლიერი პოზიციის, ძლიერი უკრაინული პოზიციის გარეშე, მხოლოდ ულტიმატუმები იქნება. დღეს კი დიპლომატია შესაძლებელია. და ჩვენ მართლაც გავძლიერდით ბოლო ერთი წლის განმავლობაში - არა კონკრეტულად 2026 წელს, არამედ სწორედ ბოლო ერთი წლის განმავლობაში, ვფიქრობ, ბოლო 10-12 თვის განმავლობაში“, - განაცხადა ზელენსკიმ.
მან ასევე აღნიშნა, რომ ზამთრის მოახლოება დიდი გამოწვევაა.
ამასთან დაკავშირებით მან უკრაინისთვის დამატებითი ფინანსური სახსრების მოძიების აუცილებლობის საკითხზეც ისაუბრა.
„იცით, ეს სერიოზული გამოწვევაა. დეფიციტია - თანხები ყველაფრისთვის გვჭირდება: ჩვენი სამხედროებისთვის, ჰუმანიტარული საჭიროებებისთვის და თავდაცვის საშუალებების წარმოებისთვის. ანუ ყველა ეს საკითხი ძალიან აქტუალურია“, - განაცხადა ზელენსკიმ.
