აშშ-ის პრეზიდენტის, დონალდ ტრამპის, სპეციალურმა წარმომადგენელმა ჯარედ კუშნერმა კიევში განაცხადა, რომ ტრამპს უკრაინაში ხანგრძლივი და მდგრადი მშვიდობის მიღწევა სურს.
კუშნერის თქმით, ტრამპი აცნობიერებს, რამდენად რთული და კომპლექსური პრობლემაა უკრაინაში მიმდინარე ომის დასრულება.
„მას ნამდვილად სურდა, გადმოგვეცა, რომ ეს ძალიან, ძალიან რთული და კომპლექსური პრობლემაა. თუმცა ეს ის პრობლემაა, რომლის მოგვარებაც ნამდვილად ღირს - არა მხოლოდ იმისთვის, რომ მიმდინარე ომი შეწყდეს, არამედ იმისთვის, რომ შეიქმნას სწორი პირობები და შეთანხმებები ხანგრძლივი და მდგრადი მშვიდობისთვის“, - განაცხადა კუშნერმა.
მისი თქმით, საუბარია ისეთ მშვიდობაზე, რომელიც უკრაინას შესაძლებლობას მისცემს, გამოიყენოს ის „წარმოუდგენელი სიმამაცე, კრეატიულობა და ძალა“, რომელსაც ქვეყანა ომის ბოლო წლების განმავლობაში ავლენდა და საკუთარი თავი დიდ სახელმწიფოდ ჩამოაყალიბოს.
„პრეზიდენტ ტრამპს ეს ნამდვილად სურს. ბევრ პოლიტიკოს რთული პრობლემების ეშინია. პრეზიდენტი ტრამპი კი ყოველთვის ამბობს: რაც უფრო რთულია პრობლემა, მით უფრო მეტად, თუ მისი მოგვარება ღირს, უნდა გაიღო მთელი ძალისხმევა მის გადასაჭრელად“, - განაცხადა კუშნერმა.
მისი თქმით, ტრამპი „ძალიან მტკიცედ არის განწყობილი, რათა დასრულდეს ეს ომი, შეწყდეს ადამიანების მკვლელობა და ოჯახებმა შვება იგრძნონ“.
კუშნერი უკრაინაში ტრამპის კიდევ ერთ სპეციალურ წარმომადგენელთან, სტივ უიტკოფთან, ერთად იმყოფება. მანამდე, 5 სექტემბერს, ისინი მოსკოვში რუსეთის პრეზიდენტ ვლადიმირ პუტინს შეხვდნენ, ხოლო 6 სექტემბერს კიევში ვოლოდიმირ ზელენსკისთან მოლაპარაკებების პირველი რაუნდი გამართეს.
