Axios-ის ინფორმაციით, მოსკოვში აშშ-ის დელეგაციის შემადგენლობაში სტივ უიტკოფისა და ჯარედ კუშნერის გარდა, აშშ-ის სახაზინო დეპარტამენტის სანქციების განყოფილების ხელმძღვანელის მოვალეობის შემსრულებელი ჯინ ლენგი, ასევე ეროვნული უსაფრთხოების საბჭოსა და სახელმწიფო დეპარტამენტის წარმომადგენლები შედიოდნენ.
გამოცემის ცნობით, ლენგი უიტკოფსა და კუშნერს მოსკოვში ვიზიტისას შეუერთდა და რუსეთის პრეზიდენტის წარმომადგენელ კირილ დმიტრიევთან გამართულ მოსამზადებელ შეხვედრაში მონაწილეობდა, თუმცა პუტინთან შეხვედრას არ დასწრებია.
Axios-ის შეფასებით, ლენგის დელეგაციაში მონაწილეობა მიუთითებს, რომ რუსეთის წინააღმდეგ დაწესებული ამერიკული სანქციები მოლაპარაკებების ერთ-ერთი საკითხი იყო.
გასულ კვირას აშშ-ის სახაზინო მდივანი სკოტ ბესენტი „დიდი ოცეულის“ ფინანსთა მინისტრების შეხვედრის ფარგლებში, ჩრდილოეთ კაროლინაში, თავის რუს კოლეგას შეხვდა. ბესენტმა განაცხადა, რომ აშშ რუსეთს ეკონომიკურ შეღავათებს არ მისცემს, სანამ მოსკოვი უკრაინის წინააღმდეგ ომს არ შეწყვეტს.
პუტინის საგარეო პოლიტიკის საკითხებში მრჩეველმა იური უშაკოვმა კი განაცხადა, რომ უიტკოფი და კუშნერი მოსკოვში ვიზიტისთვის „სერიოზულად მოემზადნენ“.
„მათ არა მხოლოდ გამოხატეს ტრადიციული დაინტერესება საბრძოლო მოქმედებების რაც შეიძლება სწრაფად შეწყვეტით, არამედ კონფლიქტის მოგვარების შესაძლო გზებთან დაკავშირებით არაერთი იდეა ჩამოაყალიბეს“, - განაცხადა უშაკოვმა.
თეთრი სახლის წარმომადგენელმა Axios-ს განუცხადა, რომ პუტინთან შეხვედრას უიტკოფთან და კუშნერთან ერთად აშშ-ის ეროვნული უსაფრთხოების საბჭოს, სახელმწიფო დეპარტამენტისა და ხაზინის დეპარტამენტის წარმომადგენლებიც ესწრებოდნენ.
მისი თქმით, შეხვედრაზე მხარეებმა შემდეგი ნაბიჯების კონკრეტული გეგმები განიხილეს, რომელთა შესახებაც უახლოეს კვირებში გახდება ცნობილი.
თეთრ სახლში იმედი აქვთ, რომ კვირას, უკრაინაში, ამერიკულ დელეგაციას არანაკლებ ნაყოფიერი შეხვედრები ექნება.
