რუსეთის პრეზიდენტ ვლადიმირ პუტინსა და აშშ-ის პრეზიდენტის წარმომადგენლებს, სტივ უიტკოფსა და ჯარედ კუშნერს შორის კრემლში გამართული შეხვედრა 3 საათსა და 10 წუთს გაგრძელდა.
პუტინის თანაშემწემ იური უშაკოვმა შეხვედრას „შინაარსიანი, კონსტრუქციული და უაღრესად გულწრფელი“ უწოდა.
მისი თქმით, უიტკოფი და კუშნერი მოსკოვში ვიზიტისთვის სერიოზულად მოემზადნენ და უკრაინაში ომის მოგვარების გზებთან დაკავშირებით არაერთი მოსაზრება ჩამოაყალიბეს.
უშაკოვის განცხადებით, ამერიკელმა წარმომადგენლებმა პირობა დადეს, რომ 6 სექტემბერს კიევში დაგეგმილ შეხვედრებზე პუტინის მიერ კონფლიქტის მოგვარების გზებთან დაკავშირებით გამოთქმულ მოსაზრებებს გაითვალისწინებენ.
„აშშ-ის წარმომადგენლები მოსკოვში ვიზიტისთვის სერიოზულად მოემზადნენ, მათ ჩამოაყალიბეს მთელი რიგი მოსაზრებები კონფლიქტის მოგვარების გზებთან დაკავშირებით“, - განაცხადა უშაკოვმა.
რუსული მხარის ინფორმაციით, შეხვედრის ფარგლებში განხილული საკითხების შესახებ დამატებითი დეტალები მოგვიანებით გახდება ცნობილი.
„პუტინი და ტრამპი პირად კონტაქტებს შეინარჩუნებენ, ხოლო უიტკოფისა და კუშნერის შუამავლობით დაწყებული მუშაობა ასევე გაგრძელდება“, - განაცხადა უშაკოვმა..
უშაკოვის თქმით, მოლაპარაკებები მხოლოდ უკრაინაში რუსეთის ომის საკითხით არ შემოიფარგლა. მხარეებმა ასევე განიხილეს რუსეთ-აშშ-ის შესაძლო მსხვილი ერთობლივი პროექტები.
თბილისის დროით 2:20 საათზე რუსულმა მედიამ გაავრცელა ინფორმაცია, რომ უიტკოფისა და კუშნერის თვითმფრინავმა რუსეთის საჰაერო სივრცე დატოვა.
მოგვიანებით ცნობილი გახდა, რომ ამერიკელი მომლაპარაკებლების თვითმფრინავი პოლონეთის ქალაქ ჟეშუვში დაეშვა.
დღეს აშშ-ის პრეზიდენტის წარმომადგენლები შეხვედრებს კიევში გამართავენ.
