გაერო-ს გენერალურმა ასამბლეამ მსოფლიო რუკის ახალ პროექციას დაუჭირა მხარი, რის შედეგად რუკაზე ქვეყნებისა და კონტინენტების ზომები უფრო რეალურად იქნება ასახული. ამის შესახებ Associated Press იუწყება.
ტოგოს ინიციატივით და აფრიკის კავშირის ქვეყნების მხარდაჭერით მომზადებულ რეზოლუციას მხარი 164-მა სახელმწიფომ დაუჭირა.
წინააღმდეგ ხმა მხოლოდ შეერთებულმა შტატებმა მისცა.
უკრაინამ, სერბეთმა, ესტონეთმა, საქართველომ, ლიეტუვამ და მოლდოვამ კენჭისყრისას თავი შეიკავეს.
დოკუმენტი მთავრობებსა და საერთაშორისო ორგანიზაციებს მოუწოდებს, უარი თქვან XVI საუკუნიდან ფართოდ გამოყენებულ მერკატორის პროექციაზე და მის ნაცვლად Equal Earth პროექცია გამოიყენონ.
მერკატორის რუკა, რომელიც მე-16 საუკუნიდან გამოიყენება, ხშირად არის კრიტიკის საგანი, რადგან ის აფრიკის კონტინენტს და კუნძულ გრენლანდიას დაახლოებით მსგავსი ზომით აჩვენებს, მიუხედავად იმისა, რომ რეალურად აფრიკა გრენლანდიაზე 14-ჯერ დიდია. ამასთან, მერკატორის რუკის მიხედვით, ეკვატორიდან დაშორებული ქვეყნები უფრო დიდები ჩანან, ვიდრე ეკვატორთან ახლოს მდებარეები.
რეზოლუცია არ კრძალავს მერკატორის რუკის გამოყენებას და არც ახალი პროექციის სავალდებულოდ გამოყენებას ითვალისწინებს - ის მხოლოდ Equal Earth-ის უფრო ფართოდ გამოყენებას უწევს რეკომენდაციას.
რუკის შეცვლის კამპანიას ბოლო პერიოდში აქტიურად უჭერდნენ მხარს აფრიკის ქვეყნები და საზოგადოებრივი ორგანიზაციები, რომლებიც მიიჩნევენ, რომ ტრადიციული პროექცია აფრიკისა და სამხრეთ ამერიკის მასშტაბებს ამცირებს.
