უკრაინის პრეზიდენტმა ვოლოდიმირ ზელენსკიმ ნატო-ს გენერალურ მდივან მარკ რუტესთან აშშ-ის პრეზიდენტ დონალდ ტრამპის სპეციალური წარმომადგენლების - სტივ ვიტკოფისა და ჯარედ კუშნერის - უკრაინაში ვიზიტი და სამშვიდობო პროცესთან დაკავშირებული შესაძლებლობები განიხილა.
„მარკს რუსეთის დარტყმების, ჩვენი თავდაცვის საჭიროებებისა და ამერიკის პრეზიდენტის წარმომადგენლებთან შეხვედრებისთვის მზადების შესახებ ინფორმაცია მივაწოდე. დიპლომატიაში პროგრესის აუცილებლობას ერთნაირად ვხედავთ და ამ დღეებში დაგეგმილი შეხვედრები შესაძლოა სასარგებლო იყოს“,- წერს ზელენსკი.
უკრაინის პრეზიდენტის განცხადებით, მან რიუტესთან ასევე განიხილა უკრაინისთვის ამერიკული Patriot-ის საჰაერო თავდაცვის სისტემებისთვის საჭირო რაკეტების მიწოდება და PURL-ის ამერიკული მრავალმხრივი ინიციატივა, რომლის ფარგლებშიც უკრაინისთვის შეიარაღების მიწოდება ხდება.
„მადლობა, რომ პარტნიორები ისმენენ ჩვენს საჭიროებას თავდაცვის დაფინანსების დეფიციტის დასაფარად. ამ მიმართულებით ვმუშაობთ. მარკმა მაცნობა PURL-ის შევსებისა და უკრაინისთვის აუცილებელი Patriot-ის რაკეტების საკითხზე მის კომუნიკაციებზე“, - განაცხადა ზელენსკიმ.
უიტკოფი და კუშნერი 6 სექტემბერს, კვირას, კიევს ეწვევიან, მანამდე კი მოსკოვში ჩავლენ. ვიზიტები ომის დასრულების საკითხზე მოლაპარაკებებს უკავშირდება.
ზელენსკის თქმით, უკრაინა ვიზიტისთვის ემზადება და მისი მიზანია „მაქსიმალურად კონსტრუქციული და შინაარსიანი ვიზიტი და მოლაპარაკებები ამერიკულ მხარესთან“.
„უნდა ვეძებოთ რეალური გზები, როგორ მივიყვანოთ ეს ომი დასრულებამდე. ვნახოთ, რა წინადადებები აქვთ სტივს და ჯარედს და რას ეტყვიან მათ ამაზე მოსკოვში“, - აღნიშნა უკრაინის პრეზიდენტმა.
