ჰორმუზის სრუტიდან გასვლისას ნავთობის გადამზიდ ორ სუპერტანკერზე თავდასხმა მოხდა.
ინციდენტები ერთმანეთიდან რამდენიმე წუთის ინტერვალით, ორშაბათს გვიან ღამით, ომანის სანაპიროსთან, ხასაბის მახლობლად მოხდა. ამის შესახებ Reuters წერს.
ერთ-ერთი ტანკერი, Sსაუდის არაბეთის დროშით ცურავს, მეორე - ლიბერიის დროშით. ორივე ტანკერს გასულ კვირას საუდის არაბეთის ჯუაიმას ტერმინალში დაახლოებით 2 მილიონი ბარელი ნავთობი ჰქონდა ჩატვირთული.
ბრიტანეთის საზღვაო სავაჭრო ოპერაციების სააგენტოს (UKMTO) ინფორმაციით, ერთ-ერთ ტანკერს სამი დაუდგენელი ჭურვი მოხვდა. ინციდენტის შედეგად ეკიპაჟის წევრები არ დაშავებულან.
თავდასხმაზე პასუხისმგებლობა ჯერჯერობით არც ერთ მხარეს აუღია.
ჰორმუზის სრუტე მსოფლიო ნავთობის ვაჭრობის ერთ-ერთი უმნიშვნელოვანესი მარშრუტია და მისი გავლით ნავთობის გლობალური გადაზიდვების დაახლოებით მეხუთედი ხორციელდებოდა.
